काठमाडौं । गायक तथा सङ्गीतकार वसन्त थापा र समीक्षा अधिकारीको स्वर रहेको लोकगीत ‘माया देकै हो’ बजारमा आएको छ । निलमप्रसाद पन्तको गीतलाई ओवी रायमाझी युट्युब च्यानलबाट बजारमा ल्याइएको हो ।
यो गीत युट्युबमा तीन लाख ४० हजार बढीले हेरिसकेको जनाइएको छ । गीतमा भरत बाराकोटीको शब्द सङ्कलन तथा गायक थापाकै सङ्गीत छ । गीतको भिडियोमा रायमाझी, सारिका केसी र मेलिना मगरले अभिनय गर्नुभएको छ । सङ्गीत संयोजन कृष्ण विकको रहेको छ भने भिडियो निर्देशन कपिल लामाले गर्नुभएको छ ।
सङ्गीतकार थापाका गीतले युट्युबमा पनि उत्तिकै भ्यूज बटुलिरहेको बताइएको छ । उहाँका धेरै गीत करोड क्लबमा छन् । उहाँले सङ्गीत गरेको गीत ‘सालको पातको टपरी’ले युट्युबमा छ करोड ५३ लाख बढी भ्यूज पाएको छ । यस्तै ‘लोभी आँखा’ दुई करोड ८५ लाख बढी, ‘चौतारीको वर’ एक करोड ९० लाख बढी र ‘उही खोलीमा पानी’ एक करोड ६८ लाख बढी पटक हेरिएको छ ।
अ लाइफ इन म्युजिक
नेपाल सङ्गीत तथा नाट्य प्रज्ञा–प्रतिष्ठान र समप्रिया सङ्गीत प्रतिष्ठानले कोरोना महामारीका बीच गत भदौ २५ गतेदेखि शुरु गरेको ‘अ लाइफ इन म्युजिक’नामक संवाद कार्यक्रमको १६ शृङ्खला सम्पन्न गरेका छन् । प्रतिष्ठानले शास्त्रीय सङ्गीत तथा नृत्य क्षेत्रका कलाकारसँग जुमका माध्यमबाट संवाद गर्दै आइरहेका छन् ।
कार्यक्रम प्रतिष्ठानको फेसबुक पेज ‘नेपाल एकेडेमी अफ म्युजिक एण्ड ड्रमा’बाट प्रत्यक्ष प्रसारण हुने गर्छ । सो कार्यक्रममा मनमोहन थपलिया, रुपक सरोद न्यौपाने, नगेन्द्रबहादुर राई, नृत्याङ्गना सुविना श्रेष्ठ, मोहन वीणा, वादक रोशन शर्मा, तवला बादक प्रमोद उपाध्याय, डा सीता थापा, विष्णु आचार्यलगायतका सङ्गीतसाधकको सहभागिता थियो । कार्यक्रमलाई कुन्दन पाठक र जोनिशा पौडेलले संयुक्तरुपमा सञ्चालन गर्दै आउनुभएको प्रतिष्ठानका सूचना अधिकृत ध्रुव वाग्लेले जानकारी दिनुभयो ।
यस्तै प्रतिष्ठानसँगको सहकार्यमा ध्रपद गुरुकूल काठमाडौँले ‘स्वर मध्यमा’ शास्त्रीय सङ्गीत साधकसँगको संवाद सञ्चालन गरिरहेको छ । गत भदौ २२ गतेदेखि फेसबुक पेजमार्फत सञ्चालन गरिएको शृङ्खला हरेक हप्ताको शनिबार प्रसारण भइरहेको प्रतिष्ठानका परिषद् सदस्य धीरेन्द्र प्रेमर्षिले जानकारी दिनुभयो ।
कार्यक्रममा बाँसुरी प्रशिक्षक जीवन आले, तवला बादक सरिता मिश्र, सुरेश सेन्चुरी, डा धु्रवेशचन्द्र रेग्मी, गायिका सङ्गीता प्रधान, गायक प्रभुराज ढकाल , तिलक ढकाल, तबला प्रशिक्षक प्रेमचन्द्र ओझैया, मोहनसुन्दर श्रेष्ठ, धनबहादुर गोपाली, सितार वादक सुष्मा शाह, सङ्गीत प्रशिक्षक श्रीराम आचार्य, चण्डीप्रसाद काफ्लेलगाय साधक सहभागी भइसक्नुभएको छ ।
