काठमाडौं । पार्टी कार्यालय डुवानमा परेपछि नेकपा एमालेको सचिवालय बैठक होटलमा बस्ने भएको छ ।
एमालेले काठमाडौंको सिंहदरबारनजिकै हनुमानस्थानमा रहेको होटल बसेरामा बैठक बस्न लागेको जनाएको हो । बैठक बिहान ११ बजेका लागि बोलाइएको छ ।
बैठकले केन्द्रीय नेताहरूको कार्यविभाजन गर्ने छ ।
गत असार २६ गते बसेको सचिवालय बैठकले पार्टीका केन्द्रीय नेताहरूको कार्यविभाजन हेरफेर गर्ने निर्णय गरेको थियो ।
सोही निर्णयानुसार कार्यविभाजन सम्बन्धी मापदण्ड बनाएर आगामी सचिवालय बैठकमा केन्द्रीय नेताको कार्यविभाजन गर्न लागिएको हो ।
मंगलवार रातिको अविरल वर्षापछि मनोहरा खोलामा आएको बाढीले च्यासलस्थित एमाले मुख्यालय डुबानमा परेको थियो ।
बढी पसेपछि अहिले पार्टी कार्यालय सरसफाइ र मर्मतको काम भइरहेको छ ।
यसैबीच एमाले अध्यक्षसमेत रहेका प्रधानमन्त्री केपी शर्मा ओलीले पार्टीका बैठक सकेसम्म सरकारी निवास बालुवाटारमा नबस्ने जानकारी दिनुभएको छ ।
उहाँले सामाजिक सञ्जालमार्फत् आफ्नो स्वास्थ्यले साथ दिएसम्म सरकारी निवास बालुवाटारमा पार्टीको बैठक नराख्ने जानकारी दिनुभएको हो ।
प्रधानमन्त्रीले भन्नुभएको छ–
शुभ बिहानी!
सामाजिक सञ्जाल मार्फत तपाईंहरूले दिनु भएको सुझाव अनुसार मेरो स्वास्थ्य अवस्थाले साथ दिएसम्म सरकारी निवास बालुवाटारमा पार्टीको बैठक नराख्ने जानकारी गराउँछु ।
आज हाम्रो पार्टीको सचिवालय बैठक छ। मनोहरा खोलामा आएको बाढीको डुबानले बैठक पार्टी कार्यालयमा बस्न नसक्ने भएका कारण यसपटक बैठक अन्यत्र राखिएको छ। यसरी नै मलाई सुझाव दिँदै जानुहोला ।
धन्यवाद !
