एजेन्सी । अल्लु अर्जुन र रश्मिका मन्दना स्टारर फिल्म ‘पुष्पा २’ को सेटबाट एउटा भिडियो लिक भएको छ । यो भिडियो फिल्मको क्लाइमेक्स दृश्यको सुटिङका क्रममा खिचिएको बताइएको छ ।
उक्त भिडियोमा फिल्मसँग सम्बन्धित कास्ट र क्रु सदस्यहरू तीव्र झगडाको दृश्य शूट गरिरहेको देखिन्छ ।
भिडियोमा रगतले लतपतिएको मान्छे हार्नेस (केबल)मा झुण्डिएको देखियो, जबकि अन्य व्यक्तिहरू सेटअपमा मद्दत गर्दै थिए । तर, यो क्लिपमा रश्मिका वा अल्लु अर्जुन देखिएनन् ।
यो भिडियो सामाजिक सञ्जालमा सार्वजनिक भएपछि फिल्मका फ्यानहरु आक्रोशित भएका छन् । उनीहरुले यो भिडियो इन्टरनेटबाट हटाउन आग्रह गरेका छन् ।
‘पुष्पा २’ को कुनै फुटेज लिक भएको यो पहिलो पटक भने होइन । यसअघि पनि रश्मिका मन्दना एक भिडियोमा उनको चरित्र श्रीवल्लीको गेट टुगेदरमा देखिएकी थिइन् ।
सुकुमार निर्देशित ‘पुष्पा २’ यस वर्षको अगस्ट १५ मा सिनेमाघरमा रिलिज हुने तय भएको थियो । तर, अब यो फिल्म यसै वर्षको डिसेम्बर ६ मा रिलिज हुँदैछ । यो पाँच भाषामा रिलिज हुनेछ ।
फिल्मको पहिलो भाग डिसेम्बर २०२१ मा रिलिज भएको थियो र यसले बक्स अफिस कमाईको धेरै रेकर्ड तोड्यो ।
