काठमाडौं । जनआस्था प्रकाशन प्रालिका अध्यक्ष तथा जनआस्था साप्ताहिकका प्रधानसम्पादक किशोर श्रेष्ठलाई ज्यान मार्ने धम्की दिएकोप्रति विभिन्न पत्रकार संगठनहरुले आपत्ति जनाएका छन् ।
मंगलबार बिहान १० बजेदेखि पटक–पटक फोन गरी कपिल सिको परिचयबाट चिनाएका व्यक्तिले अश्लिल गालीगलौज गर्दै जनआस्थाका प्रधानसम्पादक श्रेष्ठलाई सिध्याइदिने धम्की दिएका थिए ।
सोही समूहका केही व्यक्ति दिउँसो धोबिघाटस्थित कार्यालयमा कम्मरमा पेस्तोल भिरेर प्रवेश गरी हुलदंगा गर्नुका साथै बमले उडाइदिने धम्की दिएका थिए ।
घटनाप्रति विभिन्न पत्रकार संगठनहरुले आपत्ति जनाएका छन् । माओवादी केन्द्र निकट प्रेस सेन्टरले आपत्ति जनाएको छ ।
सेन्टरका महासचिव सन्तोष पौडेलले विज्ञप्ति जारी गर्दै घटनाको निन्दा र भत्र्सना गरेका छन् । साउन ८ गते मंगलबार नेकपा विप्लव समूहको विद्यार्थी संगठन अखिल (समाजवादी) को सचिवालय सचिव बताउने व्यक्तिबाट आएको ज्यान मार्ने र संस्था बमले उडाइदिने धम्कीप्रति गम्भीर ध्यानाकर्षण भएको विज्ञप्तिमा जनाइएको छ ।
यस घटनाको विषयमा आवश्यक अनुसन्धान तथा कानुनी कारबाही गर्न तथा आगामी दिनमा सञ्चारमाध्यम र पत्रकारमाथि भौतिक तथा अन्य माध्यमबाट धम्की दिने, सूचना प्रवाहमा अवरोध गर्ने तथा स्वतन्त्र प्रेसमाथि आक्रमण गर्ने गतिविधि कुनै पनि पक्षबाट नगर्न तथा हुन नदिने वातावरण निर्माण गर्न सरकार र सम्बन्धित सबै पक्षलाई अपिल गर्दछौं’ ।
सञ्चारमाध्यमको कार्यालयमा हतियारसहित गएर धम्काउनु तथा प्रधान सम्पादकलाई फोनमार्फत ज्यान मार्ने धम्की दिनु प्रेस मान्यताविपरीतको कार्य भएको सेन्टरको भनाइ छ । विज्ञप्तिमा घटनाको अनुसन्धान गरी दोषीलाई कानुनी कारबाही गर्न माग गरिएको छ ।
‘सञ्चारमाध्यमको कार्यालयमा हतियारसहित गएर धम्क्याउने तथा सम्पादकलाई फोनमार्फत ज्यान मार्ने धम्की दिने कार्य मानवअधिकारको दृष्टिकोणबाट र संविधानत: प्रेस स्वतन्त्रता र स्वतन्त्र प्रेसको मान्यता विपरीत छ । तसर्थ,यस घटनाको विषयमा आवश्यक अनुसन्धान तथा कानुनी कारबाही गर्न तथा आगामी दिनमा सञ्चारमाध्यम र पत्रकारमाथि भौतिक तथा अन्य माध्यमबाट धम्की दिने,सूचना प्रवाहमा अवरोध गर्ने तथा स्वतन्त्र प्रेसमाथि आक्रमण गर्ने गतिविधि कुनै पनि पक्षबाट नगर्न तथा हुन नदिने वातावरण निर्माण गर्न सरकार र सम्बन्धित सबै पक्षलाई अपिल गर्दछौं’, सेन्टरले भनेको छ ।
त्यस्तै,श्रमजीवी पत्रकारहरुको नेतृत्वदायी संस्था नेपाल पत्रकार महासंघ, मिडिया एक्सन नेपाललगायतका सरोकारवाला निकायले पनि सो घटनाको निन्दा गरेका छन् ।
