काठमाडौं । त्रिभुवन विमानस्थलमा बुधबार भएको सौर्य एयरलाइन्सको विमान दुर्घटनाको शोकमा आज राष्ट्रिय झन्डा आधा झुकाइँदै छ । विमान दुर्घटनामा १८ जनाको मृत्यु भएको थियो ।
यसअघि गत २७ गते चितवनको सिमलटारमा दुई वटा यात्रुवाहक बसलाई पहिरोले त्रिशूलीमा नदीमा खसाल्दा ६२ यात्रु बेपत्ता भएका थिए । उनीहरुमध्ये अहिलेसम्म २४ जनाको शव भेटिएको छ, बाँकी यात्रु बेपत्ता छन् । तर सरकारले समवेदनाबाहेक केही दिएन ।
विमान र बसमा यात्रा गर्नेहरुलाई सरकारले विभेद गरेको भन्दै सामाजिक सञ्जालमा चर्को आलोचना भइरहेका छ । सिमलटार बस दुर्घटनामा परेकाहरुप्रति सरकारले चुँसम्म बोलेको छैन । एकै पटक ६२ जना यात्रु बेपत्ता हुँदा प्रधानमन्त्री त के मन्त्रीहरुसम्म घटनास्थलमा पुग्न सकेनन् । मृतकका परिवारलाई भेटेर आश्वासन दिनसम्म उनीहरुलाई फुर्सद भएन । जबकी त्रिभुवन विमानस्थलमा विमान दुर्घटना हुँदा प्रधानमन्त्री, गृहमन्त्री, अन्य मन्त्रीदेखि उच्च पदस्थ कर्मचारीको स्थलगत अवलोकन गर्ने भीड नै लागेको थियो ।
त्यति मात्र नभएर त्रिभुवन अन्तर्राष्ट्रिय विमानस्थलमा विमान दुर्घटना हुँदा १८ जनाको ज्यान गएकोप्रति सरकारले राष्ट्रिय शोक नै घोषणा गरी राष्ट्रिय झन्डा आधा झुकाउने निर्णय गरेको छ । बस र विमान जे दुर्घटना भए पनि मानवीय क्षेत्र भएको छ । बसमा यात्रा गर्ने जीवनको मूल्य जति हुन्छ, विमानमा गर्नेको पनि उत्ति नै हो । तर सरकारले नागरिकमाथि नै विभेद गरेको छ ।
सिमलटार बस दुर्घटनाबारे छानबिन गर्न बेवास्ता गरेको सरकारले विमान दुर्घटना भएलगत्तै मन्त्रिपरिषद्को बैठक राखेर छानबिन आयोग गठन गरेको छ ।
मन्त्रिपरिषद्को बुधबार बसेको बैठकले नेपाल नागरिक उड्डयन प्राधिकरणका पूर्वमहानिर्देशक रतिशचन्द्र लाल सुमनको नेतृत्वमा ५ सदस्यीय आयोग गठन गरेको हो ।
सुमनको संयोजकमा गठित समितिलाई ४५ दिनभित्र प्रतिवेदन बुझाउने म्याद दिइएको छ । आगामी दिन यस्ता दुर्घटना हुन नदिन आवश्यक सुझावसहितको प्रतिवेदन दिन आयोग गठन गरिएको हो ।
त्यस्तै आगामी दिनमा हवाई दुर्घटना हुन नदिन आन्तरिक तर्फका सवै वायुसेवा कम्पनीहरूले जहाजको अनिवार्य परिक्षण गर्ने र नागरिक उड्ययन प्राधिकरणले सघन अनुगमन गर्नुपर्ने निर्णय गरेको छ ।
