![](https://newspolar.com/wp-content/uploads/2024/07/1721290899-iWgLA.jpg)
काठमाडौं । प्रधानमन्त्री केपी शर्मा ओलीले नेपाल विद्युत् प्राधिकरणसँग डेडिकेटेड र ट्रंक लाइनको बक्यौता विवादका सन्दर्भमा कुनै मतभेद नरहेको दाबी गरेका छन् । उनले नियम अनुसार विद्युतको बक्यौता उठाइनेसमेत बताएका छन् ।
प्रधानमन्त्री ओलीले आज अबेर राति सामाजिक सञ्जालमार्फत् उद्योगहरुमा काटिएको विद्युत् लाइन जोडिएको जानकारी दिएका छन् । नेपाल विद्युत् प्राधिकरणले विद्युत् महससलको बक्यौता रकम नतिरेका ६ उद्योगमा काटिएको विद्युत् लाइन जडान गर्ने भनिएको निर्णय साँझदेखि नै कार्यान्वयनमा आएको हो ।
प्रधानमन्त्री ओलीले सामाजिक सञ्जालमा भनेका छन्– ‘हामीलाई उद्योगहरूबाट बक्यौता उठाउनु छ, उद्योग पनि चलाउनु छ, त्यहाँका मजदुरको रोजगारी पनि जोगाउनु छ र कुल गार्हस्थ उत्पादन पनि बढाउनु छ’, उनले अगाडि भनेका छन्– ‘यस विषयमा सरकार र विद्युत् प्राधिकरणका बीचमा बाहिर आएजस्तो कुनै मतभेद छैन ।’
प्राधिकरणले तीन महिनाभित्र उद्योगीहरूको बक्यौता विद्युत् भुक्तानी नगरेमा पुन:बक्यौता असुल गर्न कारबाही अगाडि बढाउने गरी सञ्चालक समितिको बैठकको निर्णय र विद्युत् नियमन आयोगको निर्देशनअनुसार उद्योगहरूको विद्युत् लाइन जोडेको हो ।
उद्योगहरूले विद्युत् महसुलको बक्यौता नतिरेपछि गत असार २५ गतेदेखि प्राधिकरणले ती उद्योगमा लाइन काटेको थियो ।