काठमाडौं । प्रधानमन्त्री केपी शर्मा ओलीले आज प्रतिनिधिसभामा विश्वासको मत लिँदै हुनुहुन्छ । प्रधानमन्त्री ओली गत असार ३० गते प्रधानमन्त्रीमा नियुक्त हुनुभएको थियो । प्रधानमन्त्रीमा नियुक्त भएको ३० दिनभित्र प्रतिनिधिसभाबाट विशवसको मत लिनुपर्ने संवैधानिक व्यवस्था छ ।
प्रधानमन्त्री ओलीले दिउँसो १ बजे बस्ने प्रतिनिधिसभाको बैठकमा विश्वासको मत लिनुहुने छ । प्रधानमन्त्री ओलीले १ सय ९२ मत पाउने लगभग निश्चित जस्तै देखिएको छ ।
८८ सांसद भएको नेपाली काग्रेस, ७७ सांसद (देवराज घिमिरे–सभामुख र टोपबहादुर रायमाझी–निलम्बितबाहेक) भएको नेकपा एमाले, जसपा–७, जसपा नेपाल–५, जनमत पार्टी ६, लोसपा–४, नागरिक उन्मुक्ति पार्टी–४ र स्वतन्त्र सांसद अमरेशकुमार सिंहले प्रधानमन्त्रीलाई विश्वासको मत दिँदै छन् । यी सबै मत जोड्दा १ सय ९२ मत हुन्छ ।
प्रधानमन्त्री ओलीले राखेको विश्वासको मतको विपक्षमा पनि ७९ मत हुने देखिएको छ । पुष्पकमल दाहाल सरकारमा छँदाका सत्ता सहयात्री दलहरू माओवादी, रास्वपा र एकीकृत समाजवादी अहिले संसद्मा विपक्षी खेमामा एकजुट छन् । दाहाल सरकारले अघि सारेका सुशासन, समृद्धि, सामाजिक न्यायका मुद्दालाई लिएर उनीहरू विपक्षी मोर्चाबाटै एक भएर उभिने भएका हुन् ।
प्रतिनिधिसभामा माओवादी केन्द्रका ३२, रास्वपाका २१ र नेकपा एकीकृत समाजवादीका १० सांसद छन् । यसैगरी १४ सांसद भएको राष्ट्रिय प्रजातन्त्र पार्टी, एक–एक सांसद भएका राष्ट्रिय जनमोर्चा र आम जनता पार्टीले पनि प्रधानमन्त्रीलाई विश्वासको मत नदिने भएका हुन् ।
प्रधानमन्त्री ओलीले विश्वासको मत पाउन २ सय ७५ सदस्यीय प्रतिनिधिसभामा १ सय ३८ मत ल्याउनुपर्छ ।
