काठमाडौँ । आज काठमाडौंका सडकैभरि प्रहरी देखिन्छन् । प्रधानमन्त्री केपी ओलीले संसद विघटन गर्ने निर्णय गरेपछि र त्यसलाई राष्ट्रपति विद्यादेवी भण्डारीले सदर गरिदिएपछि काठमाडौंका सडकमा विरोध जुलुशहरु निस्किएका छन् । सरकारको सो निर्णयको विरोधमा सबै विपक्षी दलहरुमात्र होइन कि नेकपा नै रहेको छ ।
जसका कारण विभिन्न दलहरुले राजधानीका विभिन्न स्थानमा विरोध प्रदर्शन गरिरहेका छन् । कतिले भोलिका लागि विरोधका कार्यक्रमहरु नै सार्वजनिक गरेका छन् भने केहीले सरकारको चर्काे आलोचना गरेका छन् ।
यसैकारण आज अपरान्हदेखि नै काठमाडौंका सडकहरुमा प्रहरी बढेको तथा राजधानी र अरु पनि केही सहरमा उच्च सुरक्षा सतर्कता बढेको देखिएको छ । सरकारको विरोधमा देशव्यापी रुपमा विरोध प्रदर्शन हुने सक्ने र यसले हिंसा पनि निम्त्याउन सक्ने आशंका गर्दै सरकारले उच्च सुरक्षा सतर्कता बढाएको देखिएको हो ।
यसैबीच आज साँझ प्रधानमन्त्री केपी शर्मा ओलीले चार वटै सुरक्षा निकायका प्रमुखसँग छलफल गरेका छन् । प्रतिनिधिसभाको विघटनसँगै मध्यावधिक निर्वाचनको घोषणा भइसकेपछिको अवस्थाबारे सुरक्षा प्रमुखहरुसँग छलफल भएको हो ।
बालुवाटारमा भएको छलफलमा नेपाली सेनाका प्रधानसेनापति पूर्णचन्द्र थापा, नेपाल प्रहरीका आईजीपी शैलेश थापा क्षेत्री, सशस्त्र प्रहरी बलका प्रमुख शैलेन्द्र खनाल र राष्ट्रिय अनुसन्धान विभागका प्रमुख गणेश अधिकारी सहभागी भएका थिए ।
सरकारको एक उच्च स्रोतका अनुसार प्रधानमन्त्रीले यदि सुरक्षाको प्रबन्धमा कुनै कमी देखिएमा र अप्ठेरो अवस्थाको सिर्जना हुन लागेको भएमा समयमै खबर गर्न र आवश्यक परेमा सरकारले संकटकालको लागि पनि तयारी गर्न सुरक्षाका प्रमुखहरुसँग परामर्श गरेका थिए । तर यस विषयमा भने आज नै कुनै निर्णय नभएको समाचार स्रोतले बतायो ।
अरु एक दुई दिन देशमा नेकपाका साथै विभिन्न विपक्षी दलहरुका तर्फबाट के कस्तो विरोधको स्वरुप बाहिर आउँछ त्यस बमोजिम आवश्यक परेमा सरकार संकटकाल लगाउने विषयमा पनि सोच्न सक्ने सोँचमा प्रधानमन्त्री देखिएको बालुवाटार स्रोतले जनायो ।
