काठमाडौं । नक्कली भुटानी शरणार्थी प्रकरणका आरोपी बेचन झा पक्राउ परेपछि नेपाली कांग्रेसमा बेचैनी बढेको छ । प्रहरीले शरणार्थी प्रकरणमा अर्को चरणका अनुसन्धानसमेत अघि बढाएको छ । योसँगै कांग्रेसभित्र तरंग सिर्जना भएको हो ।
नक्कली शरणार्थी प्रकरणमा कांग्रेसका नेता बालकृष्ण खाँणविरुद्धको मुद्दा अदालतमा विचाराधीन छ । त्यस्तै यो प्रकरणमा सरकारका सचिवदेखि राजनीतिक दलका उच्च तहका नेताहरुसम्म संलग्न रहेको पाइएको छ । पूर्वउपप्रधानमन्त्री टोपबहादुर रायमाझी अहिले पनि जेलमा छन् ।
शरणार्थी प्रकरणमा फरार रहेका बेचन झाले अब धेरै कुरा सार्वजनिक गर्ने आशंका नेताहरुको छ । यो प्रकरणमा कांग्रेस सभापति शेरबहादुर देउवाकी पत्नी आरजु राणाकोसमेत संलग्नताको आशंका गरिँदै आएको छ । यसअघि पक्राउ परेका केहीले आरजुको नाम लिएका थिए । तर प्रहरीले अहिलेसम्म आरजुलाई बयानका लागिसम्म बोलाएको छैन । तर झा पक्राउ परेपछि आरजुको नाम लिने र केही प्रमाणसमेत देखाउने सम्भावना रहेको प्रहरी स्रोतले जनाएको छ ।
झाले राजनीतिको माथिल्ला तहको संरचना खुलाउन सक्ने भय कांग्रेसका नेताहरुमा छ । अघिल्लो वर्षको अनुसन्धानले गृहमन्त्री, गृहसचिव लगायतलाई पक्राउ गरेर मुद्दा चलाउन सफल प्रहरीले त्योभन्दा माथिल्लो तहको व्यक्तिको संलग्नता खोजी गर्न फाइल खुला राखेको थियो । सोहीअन्तर्गत अहिले दोस्रो चरणको अनुसन्धान थालेको प्रहरी एक वर्षपछि झालाई पक्राउ गर्न सफल भएको हो ।
उनी पक्राउ परेलगत्तै सत्तारुढ र विपक्षी दलका नेताहरुको घरदेखि सिंहदरबारसम्म भइरहेका पारिवारिक र अफिसियल भेटघाट यसैको तरंग भएको बताइएको छ ।
गत वर्ष खुलेको यो ठूलो आपराधिक प्रकरणमा प्रहरीले गरेको अनुसन्धानले पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण र सचिव टेकनारायण पाण्डे सम्मलाई जेल पुर्यायो । खाण उच्च अदालतको आदेशले धरौटीमा रिहा भएर अहिले मुद्दा खेपिरहेका छन् भने अन्य कारगारमै छन र मुद्दा चलिरहेको छ । तर मुख्य कुरा के हो भने त्यतिबेला पक्राउ परेका व्यक्तिहरुलाई मुद्दा चलाएर जेल चलान गरिए पनि प्रहरीले फाइल भने बन्द गरेको थिएन ।
प्रहरीले अनुसन्धानले नेपालीलाई भुटानी शरणार्थी बनाएर अमेरिका पठाउने योजना मन्त्रिपरिषद्बाट निर्णय गराउने जिम्मा लिने मुख्य व्यक्ति भने यिनै झा भएको देखिएको छ । किनकी यो कुरा यसै मुद्दामा अहिले कारागारमा रहेका तत्कालीन गृहसचिव टेकनारायण पाण्डे र अर्का आरोपी रामशरण केसीको बयानबाटै खुलेको थियो ।
सचिव पाण्डेले भुटानी शरणार्थी समस्यालाई राजनीतिक परियोजनाका रुपमा विकास गरेको बयान दिँदै, गृह मन्त्रालयमा राजनीतिक तहको सम्पर्कमा आएको व्यक्ति नै झा भएको प्रस्ट बताएका छन् । उनले झाको बयानले नै कुन तहसम्मको राजनीतिक नेक्सस हो खुल्न सक्ने पनि बताएका छन् । झाको संलग्नताबारे अर्का आरोपी रामशरण केसीको थप खुलासा छ । केसीले बयानमा २०७८ मंसिर १३ गते मन्त्रिपरिषद्बाट भुटानी शरणार्थीसम्बन्धी केही निर्णय हुने र त्यसका लागि झाले पैसा मागेको खुलासा गरेका छन् । उनले, २०७८ मंसिर ८ गते रातको ८ बजे नयाँ बानेश्वरमा झालाई भेटेर दुई करोडको चेक दिएको बयानमा उल्लेख गरेका छन् ।
नक्कली शरणार्थी बनाएर अमेरिका लैजाने बिचौलियाको परियोजनामा, भुटानी शरणार्थी समस्या समाधानका लागि पूर्वसहसचिव बालकृष्ण पन्थीको नेतृत्वमा बनेको समितिले तयार पारेको प्रतिवेदनमा उल्लेख नामहरु हटाएर पैसा बुझाउनेहरुको नाम राखिएको थियो । त्यही नक्कली प्रतिवेदन मन्त्रिपरिषद्बाट पास गराउने जिम्मेवारी झाले लिएको शरण केसीको बयानमा उल्लेख छ । त्यो नक्कली प्रतिवेदन मन्त्रिपरिषद्बाट पास गराउने तयारी गर्दै गर्दा प्रधानमन्त्री, शेरबहादुर देउवा थिए ।
तत्कालीन गृहमन्त्री खाँणलाई मनाएर उनीसमेत सहमत भइसकेको अवस्थामा मन्त्रिपरिषद्मा प्रस्ताव लैजाने सहजै सकिने भयो । तर पास गराउन प्रधानमन्त्री समेतको सहमति आवश्यक पर्ने हुन्छ । अब प्रश्न उठ्छ, मन्त्रिपरिषद् बैठकमा लगेर पारित गराउने त्यति ठूलो काम गर्ने जिम्मा झाले कसको आडमा लिए ? उनको गिरफ्तारीपछि अबको अनुसन्धान त्यसतर्फ केन्द्रित हुने प्रहरी स्रोत बताउँछ । झाले लिएको भनिएको दुई करोड उनले कसलाई बुझाए ? उनको बयानबाटै खुलाउने प्रहरीको तयारी छ ।
तत्कालीन गृहमन्त्री र सचिवसमेत पक्राउ परिसकेको अवस्थामा प्रहरीले बेचन झामार्फत दोस्रो चरणको अनुसन्धान अगाडि बढाउन खोज्नुले पनि यो मुद्दामा उच्चस्तरीय राजनीतिक नेक्सस रहेको आशंका देखाउँछ । प्रहरी स्रोतको दाबीअनुसार, झाको बयान र अहिलेसम्मको अनुसन्धानबाट, नक्कली शरणार्थी प्रकरणमा यसअघि पनि नाम जोडिएकी आरजु राणा देउवातर्फ शंकाको सुई घुम्न सक्छ । किनभने यसअघि पनि सन्देश शर्मा नाम गरेका अर्का आरोपीले पनि आरजुकै नाम लिएर पैसा असुल गरेको अडियो बाहिर आएको थियो । जुन अडियो प्रयोगशाला परीक्षणबाटै पुष्टि भइसकेको छ । यसले पनि झाको पक्राउले नेपाली कांग्रेसको बेचैनी बढाएको छ ।
