काठमाडौं । नेपाली कांग्रेसको पदाधिकारी बैठक आज बस्दैछ । बैठक दिउँसो ३ बजे पार्टी सभापति शेरबहादुर देउवाको निवास बूढानिलकण्ठमा बस्नेछ ।
सभापति देउवाले पछिल्लो राजनीतिक घटनाक्रमबारे छलफल गर्न पदाधिकारी तथा पूर्वपदाधिकारीको बैठक बोलाएका हुन् ।
कांग्रेस सभापति देउवाले गत शनिबार मात्रै एमाले अध्यक्ष केपी शर्मा ओलीसँग भेटवार्ता गरेपछि राजनीतिक वृत्त तरंगित भइरहेका बेला कांग्रेस पदाधिकारी बैठक बस्न लागेको हो ।
बैठकमा देउवाले एमाले अध्यक्ष ओलीसँग भएको छलफलबारे जानकारी दिने बताइएको छ ।
यसैगरी पछिल्लो राजनीतिक अवस्थाका विषयमा छलफल गरी कांग्रेसले भावी रणनीति तय गर्न पनि पदाधिकारी बैठक बोलाइएको बताइएको छ ।
