काठमाडौं । प्रमुख राजनीतिक दलहरू संक्रमणकालीन न्यायसम्बन्धी विधेयकमा सहमति जुटाउन शान्ति प्रक्रियाका बाँकी काम सहमतिबाटै पूरा गर्न सहमत भएका छन् ।
प्रधानमन्त्री पुष्पकमल दाहालले हिजो साँझ बालुवाटारमा बोलाएको बैठकमा प्रमुख तीन दल नेपाली कांग्रेस, नेकपा एमाले र माओवादी केन्द्रका नेता संक्रमणकालीन न्यायसम्बन्धी विधेयमा सहमति जुटाउन सहमत भएका हुन् ।
विधेयकमा यसअघि जुट्न नसकेको बुँदामा सहमति खोज्न सहमत भएको कानुन, न्याय तथा संसदीय मामिला मन्त्री पदम गिरीले जानकारी दिए ।
तीन दलबीच टीआरसी विधेयकलाई कसरी अघि बढाउने र शान्ति प्रक्रियाका बाँकी कामलाई कसरी निष्कर्षमा पुर्याउने विषयमा छलफल भएको थियो । त्यसमा पनि खासगरी संक्रमणकालीन न्यायलाई टुंगो लगाउनुपर्नेमा दलहरु एकमत देखिएका छन् ।
संसद्को समितिमा छलफलका क्रममा ४ वटा बुँदामा सहमति जुट्न सकेको छैन । अब सबैभन्दा पहिलो यिनै बुँदामा सहमति जुटाउने निर्णय भएको छ ।
संक्रमणकालीन न्यायसम्बन्धी विधेयकमा मेलमिलापका सम्बन्धमा पीडित पक्षको स्वतन्त्र सहमति गरेर टुंग्याउने भनिएको थियो । त्यस्तै गम्भीर मानवअधिकार र मानवअधिकार उल्लंघनमा कस्ताकस्ता कुराहरूलाई समावेश गर्ने, बालसेनामा भर्ती भएका र द्वन्द्व पीडितलाई दिने क्षतिपूर्तिबारे दलहरूबीच मतभेद छ ।
प्रधानमन्त्री दाहालले बोलाएको बैठकमा एमाले अध्यक्ष केपी शर्मा ओली, कांग्रेस सभापति शेरबहादुर देउवासहित अन्य नेताहरू सहभागी थिए ।
