काठमाडौँ । ‘इट्स माई शो’ का पूर्व प्रस्तोता सुरजसिंह ठकुरीले आफ्नो ब्रान्ड ध्वस्त भएको बताएका छन् । कान्तिपुर टेलिभिजनबाट प्रसारण हुने कार्यक्रम ‘इट्स माई शो’ विवादमा परेपछि उनले सामाजिक सञ्जालबाट यस्तो प्रतिक्रिया दिएका हुन् ।
सुरजसिंहले हाल ‘इट्स माई शो’मा आबद्ध नरहेको बताउदै आफूमाथि भईरहेको टिप्पणीहरूबारे सचेत गराएका छन् । उनले यस कार्यक्रम र यी घटनाहरूमा आफ्नो कुनै संलग्नता नरहेको स्पष्ट पारेका छन् ।
उनले आफ्नो २३ वर्षको समर्पण ध्वस्त भएको बताउदै भनेका छन्, ‘म यति मात्र भन्न सक्छु कि मेरो २३ वर्षको समर्पण, इमानदारी र मेरो ब्रान्ड प्रतिको मेरो बफादारी ध्वस्त भएको छ । एक टेलिभिजनकर्मीको रूपमा म दुखित छु र यो सामाग्रीको हिस्सा बन्न चाहन्न ।’
उनले आफ्नो भविष्यको प्रयासमा दर्शकको साथ रहने विश्वास समेत व्यक्त गरेका छन् । ‘तपाईंहरू सबैले मलाई वर्षौंदेखि देखाउनुभएको अपार माया र समर्थनको लागि म सधैं गहिरो आभारी छु। तपाईंको प्रोत्साहन मेरो क्यारियरमा एक प्रमुख शक्ति भएको छ’, उनले भनेका छन् ।
