एजेन्सी । साविक विजेता इंग्ल्यान्ड टी–२० विश्वकपको सेमिफाइनलमा प्रवेश गरेको छ । इंग्लिस टोली एकतर्फी खेलमा अमेरिकालाई १० विकेटले पराजित गर्दै शीर्ष ४ मा पुगेको हो ।
जारी विश्वकपमा सेमिफाइनलमा स्थान बनाउने इंग्ल्यान्ड पहिलो टोली बनेको छ । ब्रिजटाउनमा इंग्ल्यान्डले सेमिफाइनलमा पुग्न १८.४ ओभरमा ११६ रनको लक्ष्य पछ्याउनुपर्ने भएपनि डिफेन्डिङ च्याम्पियनले कुनै विकेट नगुमाई ९.४ ओभरमा नै जित हात पारेको थियो ।
खेलमा इंग्ल्यान्डका बलर क्रिस जोर्डनले ह्याट्रिक गरेका थिए । यो जारी विश्वकपको तेस्रो ह्याट्रिक हो । यसअघि सन् २०२१ को टी–२० विश्वकपमा तीन ह्याट्रिक भएको थियो । जोर्डनले १९ औं ओभरको ५ बलमा ४ विकेट लिए ।
यसअघि प्याट कमिन्सले बंगलादेश र अफगानिस्तानविरुद्ध ह्याट्रिक गरेका थिए । जोर्डन जारी टी–२० विश्वकपमा ह्याट्रिक गर्ने दोस्रो बलर बनेका छन् ।
यस्तै, उनी टी–२० विश्वकपको एक ओभरमा ४ विकेट लिने दोस्रो बलर बनेका छन् । उनले आयरल्यान्डका कर्टिस क्याम्फरको ४ विकेटको कीर्तिमानलाई पछि पारेका छन् । उनले २०२१ को विश्वकपमा एक ओभरमा ४ विकेट लिएका थिए ।
