बुटवल । उपेन्द्र यादव नेतृत्व जनता समाजवादी पार्टी (जसपा) नेपालले लुम्बिनी सरकारलाई दिएको समर्थन फिर्ता लिएको छ ।
पार्टी संसदीय दलकी प्रमुख सचेतक अम्बिका काफ्लेले आज एक विज्ञप्ति जारी गर्दै प्रतिपक्ष दलको भूमिकामा बस्ने निर्णय भएको जानकारी गराएकी हुन् ।
उनी समानुपातिकबाट सांसद बनेकी हुन् । प्रत्यक्षबाट सांसद बनेका अहिर भण्डारी लाल र आदेश अग्रवालले भने अशोक राई नेतृत्वको जसपामा छन् । कृषीमन्त्री बनेका भण्डारी लालले भने आफूहरुसरकार मै रहने बताएका छन् ।
जेठ ५ गते बसेको पार्टीको लुम्बिनी प्रदेश समितिको बैठकले सरकारलाई दिएको समर्थन फिर्ता लिने निर्णय गरेको काफ्लेले जनाएकी छन् । सोही अनुसार संविधानको धारा १८८ को उपधारा २ बमोजिम जनता समाजवादी पार्टी, नेपाल लुम्बिनी प्रदेश सभा संसदीय दललाई समेत सरकारलाई दिएको समर्थन फिर्ता लिन निर्देशन पार्टीले दिइसकेको उनले बताईन् ।
जसपा नेपालले समर्थन फिर्ता लिएपनि सरकार अल्पमतमा पर्दैन । ८७ सदस्यीय प्रदेश सभामा बहुमतका लागि ४४ सांसद भए पुग्छ ।
माओवादी केन्द्रबाट मुख्यमन्त्री बनेका जोखबहादुर महरालाई एमालेका २९, माओवादी केन्द्रका १०, नागरिक उन्मुक्तिका ४ जसपाका २, एकीकृत समाजवादीका एक र एक जना स्वतन्त्र सांसद गरी ४७ जनाको समर्थन अझै कायम छ ।
