काठमाडौं । पशुपतिनाथ मन्दिरको भेटी चोरी आरोपमा पक्राउ परेका पाँचजनालाई पुर्पक्षका लागि कारागार चलान गरिएको छ ।
बुधबार काठमाडौं जिल्ला अदालतका न्यायाधीश कपिमणि गौतमको इजलासले पक्राउ परेका ६ जनामा पाँच जनालाई पुर्पक्षका लागि कारागार पठाउने र एक जनालाई धरौटीमा छोड्न आदेश गरेका हुन् ।
पक्राउ परेका ६ जनाविरुद्ध २ करोड ३० लाख १ हजार बिगो मागदाबी गर्दै चोरीको कसुरमा मुद्दा चलाइएको थियो ।
अदालतको आदेशसँगै पशुपति क्षेत्र विकास कोषका नायब सुब्बा नवराज ढोडारी, मन्दिरका ब्राह्मण नवराज घिमिरेसहित सञ्जय कपाली, कुमार दमाई र अनिल परियार कारागार चलान भएका छन् । यस्तै, सत्यनारायण जोशी ३ लाख धरौटी तिरेर रिहा भएका छन् ।
