काठमाडौँ । आईसीसी टी–२० विश्वकप अन्तर्गत समूह बी को अन्तिम खेलमा स्कटल्यान्ड अस्ट्रेलियासँग ५ विकेटले पराजित भएको छ ।
आइतबार बिहान भएको खेलमा अष्टेलियासँग स्कटल्यान्ड पराजित भएपछि इंग्ल्यान्ड शीर्ष २ मा रहँदै सुपर ८ मा पुगेको छ। इंग्ल्यान्ड र स्कटल्यान्डको समान ५ अंक भए पनि नेट रनरेटमा इंग्ल्यान्ड अघि रहँदै सुपर ८ मा पुगेको हो।
समूह बी बाट अस्ट्रेलियाले भने अपराजित रहँदै सुपर ८ खेल्नेछ। यो समूहबाट स्कटल्यान्डसँगै नामिबिया र ओमान विश्वकपबाट बाहिरिएका छन्।
स्कटल्यान्डले दिएको १ सय ८१ रनको लक्ष्य अस्ट्रेलियाले २ बल अगावै ५ विकेटको क्षतिमा भेट्टायो। अस्ट्रेलियाका ओपनर ट्राभिस हेडले सर्वाधिक ६८ रनको योगदान दिए। उनले ४९ बलमा ५ चौका र ४ छक्का प्रहार गरे।
मार्कस स्टोइनिसले २९ बलमा ९ चौका र २ छक्का प्रहार गर्दै ५९ रन बनाए। टिम डेभिड २४ र म्याथु वेड ४ रनमा नटआउट रहे।
स्कटल्यान्डका मार्क वाट र सफ्यान सरिफले समान २ विकेट लिए। ब्राड वेलको नाममा १ विकेट रह्यो।
त्यसअघि पहिला ब्याटिङ गरेको स्कटल्यान्डले निर्धारित २० ओभरमा ५ विकेटको क्षतिमा १ सय ८० रनको योगफल बनाएको थियो । स्कटल्यान्डका ब्रान्डोन एमसीमुलेनले सर्वाधिक ६० रन बनाए। उनले ३४ बलमा २ चौका र ६ छक्का हाने।
कप्तान रिची बेरिग्टोन ३१ बलमा १ चौका र २ छक्कासहित ४२ रनमा नटआउट रहेका थिए। ओपनर जर्ज मुन्सेले ३५ रन बनाउदा म्याथु क्रसले १८ रन बनाएका थिए ।
अस्ट्रेलियाका ग्लेन म्याक्सवेलले २ विकेट लिएका थिए। एष्टोन अगर, नाथल इलिस र आडम जम्पाले समान १ विकेट झारे।
