काठमाडौं । नयाँ राजनीतिक समीकरण बनेको एक सय दिन पुगेलगत्तै प्रधानमन्त्री पुष्पकमल दाहाल आफ्नै सहयात्री दलको दबाबमा पर्नुभएको छ । कांग्रेससँगको समीकरण भएका बेला राम्रो गर्ने अवस्था नपाएको र सहकर्मीहरुले असहयोग गरेको गुनासो गर्दै एमाले र राष्ट्रिय स्वतन्त्र पार्टीसँग समीकरण गर्न पुगेका प्रधानमन्त्री दाहाल अहिले दबाबमा पर्नुभएको हो ।
नेकपा एमालेका अध्यक्ष केपी शर्मा ओलीले सरकारले ल्याएको बजेटको चर्को आलोचना मात्र गरेका छैनन्, आफ्ना सांसदलहरुलाई खुलेर बैठकमा छलफल गर्न निर्देशन दिएका छन । उनले सरकारको कामप्रति सन्तुष्ट हुन नसक्ने चेतावनी दिइसकेका छन् ।
ओलीले आफू सम्मिलित सरकारले ल्याएको बजेटप्रति आलोचना गर्दै मुलुकको विकास गर्न सरकारमा गएको र त्यो हुन नसके आफू सन्तुष्ट हुन नसक्ने बताएका हुन् ।
संसद्मा बजेट प्रस्तुत् हुनुअघि प्रधानमन्त्री दाहालले समाजवादको आधार तयार गर्ने कार्यक्रममा लाखौं रोजगारी सिर्जना गर्ने, निम्न वर्गलाई गुणस्तरीय शिक्षा, स्वास्थ्य, सामाजिक सुरक्षामा केन्द्रित गर्ने दाबी गरेका थिए । यसअघि जेठ १९ मा दलको बैठकमै ओलीले बजेट माओवादीतिर ढल्केको र माओवादी रङ देखिएको टिप्पणी गरेका थिए । बजेट तयार गर्ने क्रममा प्रधानमन्त्री दाहाल, ओली, अर्थमन्त्री वर्षमान पुन र एमाले उपाध्यक्ष एवं पूर्वअर्थमन्त्री विष्णु पौडेलबीच छलफल भए पनि ओलीले बजेटमाथि आपत्ति जनाउँदै आएका छन् । सत्ता समीकरणको प्रमुख दल एमाले अध्यक्ष ओलीले बजेटमा असन्तुष्टि जनाउनु प्रधानमन्त्री दाहालमाथि निरन्तर दबाब दिने नीति लिएको देखिन्छ ।
एकातिर एमाले अध्यक्ष ओलीले दबाब दिएकै दिन अर्कोतिर सत्तारुढ राष्ट्रिय स्वतन्त्र पार्टीबाट खेलकुद मन्त्री भएका विराजभक्त श्रेष्ठले सरकारलाई दिएको समर्थन फिर्ता लिनेबारे गम्भीर समीक्षा आवश्यक भइसकेको बताएका छन् । सरकारमा गएर पनि काम गर्न नसकिएको भन्दै उनले प्रधानमन्त्रीलाई धम्कीपूर्ण चेतावनी दिएका हुन् । यसले पनि प्रधानमन्त्री दाहालसँग आफ्नै सहकर्मी सन्तुष्ट छैनन् भन्ने पुष्टि हुन्छ ।
त्यसो त राष्ट्रिय स्वतन्त्र पार्टीका सभापति रवि लामिछानले पनि सरकारमा गएका एक सय दिनमा देशका लागि नराम्रो काम नगरेको बताएका छन् । त्यसको अर्थ उनले पनि राम्रो काम गर्न सकिने भन्ने स्वीकार गर्नु नै हो । लामिछाने पनि प्रधानमन्त्री दाहालसँग सन्तुष्ट नहुँदा खुलेर सरकारको बचाउ गर्न नसक्ने अवस्थामा पुगेको विश्लेषण गर्न थालिएको छ ।
प्रधानमन्त्री दाहालसँग गठबन्धन दलकै शीर्ष नेताहरुबाट लगातार असन्तुष्टिको स्वर आउनुलाई गठबन्धनभित्रको मतभेद छर्लङ्ग हुन्छ । एकातिर प्रधानमन्त्री दाहाललाई दबाबमा राख्ने र अर्कोतिर विकास नै भएर वा सरकारले काम नै गर्न सकेन भनेर आफू हावी हुन खोज्ने प्रवृत्तिले अहिले पनि निरन्तरता पाएको देखिन्छ ।
