जनकपुर । जनता समाजवादी पार्टी (जसपा) नेपालको अध्यक्षबाहेक १९ पदाधिकारीसहित २०० पदका लागि आज निर्वाचन हुँदैछ । आज दिउँसो १२ बजेदेखि ३ बजेसम्म मतदान हुने निर्वाचन समितिले जनाएको छ ।
अध्यक्ष पदमा उपेन्द्र यादवको निर्विरोध निर्वाचित भइसकेका छन् ।
सोमबारदेखि जनकपुरधामको महेन्द्र नारायण निधि संस्कृति कलाकेन्द्रमा जारी जसपा नेपालको प्रथम राष्ट्रिय महाधिवेशन अन्तर्गत बुधबार बिहान साढे १० बजेदेखि साढे ११ बजेसम्म मनोनयन दर्ता भएको थियो ।
एक सहअध्यक्ष पदका लागि ३ जनाको उम्मेदवारी परेको छ भने उपाध्यक्षमा २३ जनाले उम्मेदवारी दर्ता गराएका छन् । ५ जना उपाध्यक्ष पदका लागि पुरुषतर्फ १७ र महिलातर्फ ५ जनाको उम्मेदवारी परेको निर्वाचन समितिले जानकारी दिएको छ ।
यसैगरी २ महासचिव पदका लागि ५ जनाले उम्मेदवारी दिएका छन् । उपमहासचिवतर्फ २ खुला र एक महिला पदका लागि १२ जनाको उम्मेदवारी परेको छ भने खुलातर्फ ९ र महिलातर्फ ३ जनाको उम्मेदवारी परेको छ निर्वाचन समितिले जानकारी दिएको छ ।
सचिवतर्फको ७ पदका लागि ३४ जनाको उम्मेदवारी परेको छ । त्यसैगरी, कोषाध्यक्षमा एक पदका लागि ३ जनाको उम्मेदवारी परेको छ ।
महाधिवेशनका लागि भनेर देशभरबाट एकसय पर्यवेक्षकसहित १ हजार ३४९ प्रतिनिधि छनोट भएका छन् ।
