एजेन्सी । आईतबार टी २० विश्वकपमा भारत र पाकिस्तानबीच हाई भोल्टेजको खेल भएको थियो ।
अमेरिकाको नासाउ अन्तर्राष्ट्रिय क्रिकेट मैदानमा भएको खेलमा भारतले पाकिस्तानलाई ११९ रनको लक्ष्य पनि पूरा गर्न दिएको थिएन ।
यो खेल हेर्न सचिन तेन्दुलकर र क्रिस गेल जस्ता महान खेलाडी पनि आएका थिए । भारत र पाकिस्तानका फ्यानले रंगशाला खचाखच भरिएको थियो । यो खेलमा धेरै उतारचढाव आए । धेरै क्याच छुटे, धेरै समातिए। कहिले बलर ब्याट्सम्यानसँग ठोक्किन पुगे ।
आईतबार वर्षाका कारण भारत–पाकिस्तान खेल ढिला भएको थियो । जसको कारण ७:३० मा हुनुपर्ने टस ८ बजे भएको थियो । टस गर्न भारतका कप्तान रोहित शर्मा र पाकिस्तानका कप्तान बाबर आजम फिल्डिङमा पुगेका थिए ।
होस्ट रवि शास्त्रीले रोहित शर्मालाई सिक्का टस गर्न भने । तर रोहित भने एकछिन अलमल्ल परे । उनले टसको सिक्का आफ्नो खल्तीमा थियो भनेर बिर्सेका थिए । बाबर आजमले सिक्का उनको खल्तीमा भएको ईसारा दिए र पछि रोहितले आफ्नो खल्तीबाट सिक्का निकालेर फ्याँके ।
पाकिस्तानले टस जितेर भारतलाई ब्याटिङको निम्तो दिएको थियो । पहिले ब्याटिङ गर्दा भारतीय टोली १९ ओभरमा सबै विकेट गुमाएर ११९ रनमा सिमित भयो । जवाफमा ब्याटिङ गरेको पाकिस्तानले ७ विकेट गुमाएर ११३ रन मात्रै बनाउन सक्यो ।
