काठमाडौं । उच्च अदालत पोखराले तनहुँको व्यास नगरपालिकाको पुन: मतगणना गर्न दिएको आदेश रोक्न माग गर्दे मेयर वैकुण्ठ न्यौपानेले सर्वोच्च अदालतमा रिट दायर गर्नुभएको छ ।
गत जेठ १ गते व्यास नगरपालिकाको पुन: मतगणना गर्न उच्च अदालतका न्यायाधीशद्वय राजनप्रसाद भट्टराई र निर्मला पौडेल भट्टराईको संयुक्त इजलासले आदेश दिएको थियो। २०७९ वैशाखमा भएको निर्वाचनमा नगरपालिका प्रमुखमा स्वतन्त्र उम्मेदवारी दिएर पराजित दीपकराज जोशीले पुन: मतगणनाको माग गर्दै उच्च उदालत पोखरामा दर्ता गराउनु भएको मुद्दामा अदालतले पुन: मतगणना गर्न आदेश दिएको थियो ।
नगर प्रमुख न्यौपानेले दायर गर्नुभएको रिटको पेसी जेठ २७ गते आइतबार तोकिएको छ।
रिटमा निर्णय सर्वोच्चबाट पुनरवलोकन हुन सक्ने र सर्वोच्चबाट अन्तिम निर्णय नभएसम्म उच्चको आदेशकै भरमा पुन: मतगणना गरिए आफूलाई अपूरणीय क्षति हुने दाबी गरिएको छ ।
