एजेन्सी । अष्ट्रेलियाले २०२४ को टी–२० विश्वकपमा विजयी सुरुवात गरेको छ । बिहिबार बिहान बार्बाडोसको केन्सिङ्टन ओभलमा भएको खेलमा अस्ट्रेलियाले ओमानलाई ३९ रनले हराएको हो । तर यो जितको खुसीसँगै तिब्र गतिका बलर मिचेल स्टार्कको चोटले अष्ट्रेलियाको क्याम्पको समस्या पनि बढाएको छ ।
स्टार्क खेलको क्रममा घाइते भएका थिए। खेलको बिचमा क्रयाम्प आएको स्टार्कले इंग्ल्याण्डविरुद्धको खेल गुमाउनेमा आशंका गरिएको छ ।
स्टार्कले ३ ओभरमा २० रन दिएर २ विकेट लिएका थिए । स्टार्कले इनिङ्सको पहिलो ओभरमै विकेट लिएका थिए । उनी १५ औं ओभरमा आफ्नो स्पेलको अन्तिम ओभर बल गर्न आएका थिए । पहिलो बल वाइड फ्याकेपछि उनी असहज देखिए ।
उनलाई क्रयाम्प भएपछि मैदानमा फिजियो पनि बोलाईएको थियो । तर उनी खेल्ने स्थितीमा नरहेपछि मैदानबाट बाहिरिए। उनको स्थानमा ग्लेन म्याक्सवेललाई १५ औं ओभर बलिङ गर्न दिईएको थियो ।
खेल पछि, कप्तान मार्सले स्टार्कको बारेमा बोल्दै भने, ‘स्टार्सीलाई क्र्याम्प भएको थियो त्यसैले उनी बाहिर जान चाहन्थे। र उनी बाहिर गए । हामी इङ्ल्यान्डविरुद्ध खेल्न उत्साहित छौं।’
खेलमा ओमानले टस जितेर फिल्डिङ गर्ने निर्णय गरेको थियो । पहिले ब्याटिङ गरेको अष्ट्रेलियाले २० ओभरमा १६४-५ रन जोडेको थियो । टोलीका लागि मार्कस स्टोइनिसले ३६ बलमा २ चौका र ६ छक्कासहित ६७ रन बनाए ।
जवाफमा लक्ष्य पछ्याएको ओमानको टोलीले २० ओभरमा ९ विकेट गुमाएर १२५ रन मात्र बनायो । यस अवधिमा अस्ट्रेलियाका लागि मार्कस स्टोइनिसले सर्वाधिक ३ विकेट लिए । उत्कृष्ट अलराउन्ड प्रदर्शनका लागि स्टोइनिसलाई ‘प्लेयर अफ द म्याच’को उपाधि दिइएको थियो ।
