काठमाडौँ । ‘सिधाकुरा डट कम’मा प्रसारण भएको ‘डार्क फाइल’ को अडिओ झुटो भएको पाइएको छ ।
सर्वोच्च अदालतको आदेशअनुसार प्रहरीले साइबर ब्युरोका प्रमुखसमेत रहेका डिआइजी नविन्द अर्याल नेतृत्वको ६ सदस्यीय छानबिन समिति बनाएको थियो । उक्त समितिले अडिओ झुटो भएको निष्कर्ष निकालेको हो ।
सिधाकुरा डट कमले अदालतका न्यायाधीश, केही वरिष्ठ वकिल र मिडिया सञ्चालकहरूलाई मुद्दा मिलाएको आरोप लगाउँदै उक्त अडिओसहितको समाचार प्रकाशन गरेको थियो ।
सर्वोच्च स्रोतका अनुसार छानबिन प्रतिवेदनमा सिधा कुरा डट कमलाई अडिओ दिने राजकुमार तिमिल्सिनाले गत वैशाख ५ गते बिहानतिर उक्त अडिओ आफै रेकर्डिङ गरेको उल्लेख गरिएको छ ।
अडिओ परीक्षण गर्दा तिमल्सिनाको बाहेक अन्य आरोप लगाइएका कसैसँग पनि मेल नखाएको प्रतिवेदनमा उल्लेख छ ।
सिधा कुरा डटकमले गत वैशाख १४ गते ‘चार सय बढी भ्रष्टाचारका मुद्दा डिसमिस गराउने सर्वोच्च अदालतका न्यायाधीश सहभागी बैठकको स्टिङ अपरेसन’ भनेर समाचार प्रसारण गरेको थियो ।
अडिओ प्रसारणभएपछि सर्वोच्चले अदालतको अवहेलना भएको भन्दै रिट दायर भएको थियो भने त्यसपछि सिधाकुराले उक्त सामग्री हटाएको थियो ।
