जकार्ताः इन्डाेनेसियाकाे घरेलु उडानमा रहेकाे एउटा विमान शनिबार अपराह्न उडेकाे केही क्षणमै सम्पर्क विहीन भएकाे छ । उक्त विमान राजधानी जकार्ताबाट पाेन्टीयानाकतर्फ उडेकाे थियाे ।
अधिकारीहरूका अनुसार श्रीविजाया एयरकाे उक्त विमानमा ६२ जना सवार थिए । इन्डाेनेसियाकाे यातायात मन्त्रालयका प्रवक्ता अदिता इरावातीका अनुसार बाेइङ ७३७-५०० विमान जकार्ताबाट स्थानीय समय अनुसार अपराह्न १.५६ बजे उडेकाे र २.४० मा टावरसँग सम्पर्क विच्छेद भएकाे थियाे ।
विमान कम्पनीले जारी गरेकाे विज्ञप्तिमा याे विमानकाे उडान समय करिव ९० मिनेटकाे थियाे । विमानमा ५६ जना यात्रु र ६ जना चालक दलका सदस्य थिए ।
विमानकाे खाेज तथा उद्धार अभियान शुरू भइसकेकाे यातायात मन्त्रालयले जनाएकाे छ ।
टापुहरूकाे देश भनेर चिनिने इन्डाेनेसियामा नियमित अन्तरालमा विमान दुर्घटना हुने गरेका छन् ।
अक्टाेबर २०१८ मा लायन एयरले संचालन गरेकाे बाेइङ ७३७ म्याक्स ८ जेट पनि राजधानी जकार्ताबाट उडेकाे केही मिनेटभित्रै जाभा समुद्रमा खसेकाे थियाे । त्यस दुर्घटनामा विमानमा सवार सबै १८९ जनाकाे मृत्यु भएकाे थियाे । सन् १९९७ मा पनि गरूड विमान सेवाकाे एउटा विमान मेडानमा दुर्घटनाग्रस्त हुँदा २३४ यात्रुकाे ज्यान गएकाे थियाे भने सन्र २०१४ काे डिसेम्बरमा एयर एसियाकाे जहाज सुराबायाबाट सिंगापुर जानेक्रममा समुद्रमा खसेर १६२ जनाकाे मृत्यु भएकाे थियाे । (एसाेसिएटेड प्रेस)
