एजेन्सी । टी–२० विश्वकपमा भारत–पाकिस्तान खेलका बेला आतंकवादी हमलाको खतरा देखिएको छ । भारत–पाकिस्तानको खेल जुन ९ मा न्युयोर्कको आइसेनहोवर पार्कस्थित नासाउ काउन्टी इन्टरनेशनल क्रिकेट स्टेडियममा हुन लागेको छ । जोखिमलाई मध्यनजर गर्दै सहरको सुरक्षा व्यवस्था कडा पारिएको छ ।
आतंकवादी संगठन आइएसआईएसको खोरासानले एक भिडियो जारी गर्दै आफ्ना आक्रमणकारीहरूलाई ‘लोन वुल्फ’ आक्रमण गर्न आग्रह गरेको भारतीय सञ्चारमाध्यमले लेखेको छ । लोन वुल्फ आक्रमण केवल एक आक्रमणकारीको प्रयोग गरिन्छ।
खबर पाएसँगै न्यूयोर्कका गभर्नरले सुरक्षा व्यवस्थालाई थप कडाइ गर्न निर्देशन दिएका छन् । गभर्नर क्याथी होचेलले भनेका छन्– ‘विश्वकपलाई लिएर कुनै गम्भीर खतरा छैन। सुरक्षा व्यवस्थालाई थप कडाइ गरिएको छ । प्रशासनले हरेक अवस्थाको निरन्तर अनुगमन गरिरहेको छ ।’
टी–२० विश्वकपमा ५–५ टोलीलाई ४ समूहमा विभाजन गरिएको छ। भारत र पाकिस्तानको समुहमा आयरल्याण्ड, क्यानडा र अमेरिका पनि रहेका छन्। भारत र पाकिस्तानले आफ्ना सबै खेल अमेरिकामा मात्र खेल्नेछन् ।
