काठमाडौ । कानूनी रुपमा विभाजन नभएको तर फुटिसकेको नेकपाको मुद्दा निर्वाचन आयोगलाई पेचिलो बन्दै गएको छ ।
सोमबार नेकपाको एउटा खेमा नेपाल – दाहाल समूहका अध्यक्ष माधवकुमार नेपाल र पुष्पकमल दहाल निर्वाचन आयोगमा पुगेर निर्वाचनको तयारी रोक्न माग गर्नुभयो । उता प्रमुख निर्वाचन आयुक्त दिनेश थपलिया र अन्य दुई आयुक्तले नेपाल र दाहाललाई विगतमा पनि अदालमा मुद्दा विचाराधीन रहेको अवस्थामा आयोगले कामलाई निरन्तरता दिएको स्मरण गराउनु भएको थियो ।
जुन दिन सरकारले प्रक्रिया रोक्न निर्देशन दिन्छ, त्यस दिनबाट रोकिन्छ नत्र कसरी रोक्नु भन्ने प्रश्नमा नेताहरू नेपाल र दाहालले विशिष्ट अवस्थाको बाध्यतालाई आयोगले बुझ्नुपर्ने सुझाव दिनु भएको थियो । आयोगमा पदाधिकारीहरुले कानूनमा त्यस्तो व्यवस्था नभएको भन्दै अबका दिनमा कानूनी व्यवस्थाका लागि सुझाव समेत दिएका थिए ।
आयोगले निर्वाचनको तयारी, आयोगलाई परेको कठिनाई लगायतका विषयमा पूर्व प्रमुख आयुक्तहरु भोजराज पोखरेल, सूर्यप्रसाद श्रेष्ठ, नीलकण्ठ उप्रेती र अयोधीप्रसाद यादवसँग पनि छलफल गरेको छ । यसैगरी पूर्व कानून सचिवहरु राजुमान सिंह मल्ल, कमलशाली घिमिरे, राजीव गौतम, ठोकप्रसाद शिवाकोटीसँग पनि आयोगले राय लिएको छ ।
उता एक साताभित्र आयोगलाई विवरण बुझाउन पत्राचार गरेपछि दुबै पक्ष शक्ति प्रदर्शन सहित बुधबार निर्वाचन आयोग जाने तयारी गरिरहेका छन् ।
