काठमाडौं । लक्ष्मी बैंकको २०औं साधारण सभाले प्रस्तावित लाभांश पारित गरेको छ । साधारणसभाले सेयरधनीलाई ११.५ प्रतिशत लाभांश दिने प्रस्ताव पारित गरेको बैंकले जनाएको छ ।
यससँगै सेयरधनीले बैंकको चुक्ता पुँजीको ९ प्रतिशत बोनस सेयर र २.५ प्रतिशत नगद गरी ११.५ प्रतिशत लाभांश पाउने छन् । पारित बोनस सेयरसँगै बैंकको चु
क्ता पुँजी १० अर्ब ६९ करोड रुपैयाँ पुगेको छ ।
बैंकको संस्थापक सेयरधनीका तर्फबाट अर्थविद तथा वित्तीय योजनाकार डा .मनिष थापा संचालक समितिमा चुनिनु भएको छ । यसैगरी सभाले सर्वसाधारण सेयरधनीको तर्फबाट विश्वकरण जैन तथा स्वाती रुङ्गटालाई पनि सञ्चालक समितिमा निर्वाचित गरेको छ ।
साधारण सभाले आर्थिक वर्ष २०७५-७६ का लागि संचालक समितिको प्रतिवेदन तथा सोही आर्थिक वर्षको बैंकको वित्तीय विवरण उपर छलफल गरी स्वीकृत गरेको बैंकले जनाएको छ ।
त्यस्तै, आर्थिक वर्ष २०७६-७७मा १ खर्ब ७६ करोड रुपैयाँ निक्षेप र ८९ अर्ब ८९ करोड रुपैयाँ कर्जा पुर्याएको यस बैंकको वासलातको आकार १ खर्ब २८ अर्ब रुपैयाँ रहेको छ । सो आर्थिक वर्षमा बैंकले १ अर्ब ४१ करोड रुपैयाँ खुद मुनाफा आर्जन गर्न सफल भएको छ । यसका साथ साथै सम्पूर्ण वित्तीय सूचकहरु नियामक व्यवस्थाअनुरुपनै राम्रो अवस्थामा रहेका बैंकले जनाएको छ ।
