एजेन्सी । भारतीय क्रिकेट टीमका स्टार क्रिकेटर हार्दिक पाण्डेयको टीम मुम्बई इन्डियन्स आईपीएल २०२४ बाट बाहिरिसकेको छ । धेरैपटक फाइनल जित्ने टिमको हिस्सा रहेका पाण्डेयको टीम यसपटक भने क्वालिफायरभन्दा अगाडि नै बाहिरिएको हो ।
खेलसँगै हार्दिक आफ्नो व्यक्तिगत जीवनका कारणले पनि चर्चामा आएका छन् । यतिबेला उनले आफ्नी पत्नी नताशा स्टान्कोभिकसँग सम्बन्धविच्छेद गर्न लागेका कुरा भारतिय मिडियामा टन्नै भेटिन्छन् । यद्यपी यस सम्बन्धमा आधिकारिक जानकारी भने आएको छैन ।
पाण्ड्या र नताशा सामाजिक सञ्जालमा निकै सक्रिय छन् । तर, फेब्रुअरीदेखि यी दुवै सामाजिक सञ्जालमा सँगै देखिएका छैनन् । आईपीएल २०२४ मा पाण्ड्या नराम्ररी ट्रोल भएका थिए । मुम्बई इन्डियन्सको कप्तानीका कारण उनको आलोचना भएको थियो र अब उनी आफ्नो व्यक्तिगत जीवनका कारण समस्यामा पर्ने बताईएको छ ।
हालै हार्दिककी श्रीमतीले इन्स्टाग्रामबाट पतिको नाम हटाएकी छन् । जसले गर्दा सामाजिक सञ्जालमा मानिसहरू उनीहरूको सम्बन्धमा दरार आएको अड्कलबाजी गरिरहेका छन् ।
गत मार्च ४ गतेका दिन नताशाको जन्मदिनमा हार्दिकले कुनै पोष्ट नगर्दा पनि सबैले सम्बन्धमा दरार आएको अनुमान लगाइरहेका थिए । नताशाले नाम हटाए पनि पतिसँगका तस्वीरहरू भने हटाएकी छैनन् ।
हार्दिकले २०२० मा नताशासँग विवाह गरेका थिए ।
