काठमाडौं । सहकारीको रकम अपचलनबारे छानबिन गर्न गठन गरिने संसदीय छानबिन समितिको क्षेत्राधिकार टुंगो लगाउन गठित कार्यदलको बैठक आज पनि बस्दै छ ।
सिंहदरबारस्थित कानुन, न्याय तथा संसदीय मामिला मन्त्रालयमा बैठक बस्न लागेको हो । समितिको कार्यादेश तय सत्तापक्ष र विपक्षीले कानुनमन्त्री पदम गिरीको संयोजकत्वको कार्यदल गठन गरेका थिए ।
यसअघि हिजोकाे बैठकमा कार्यदलका सदस्यहरूबीच छलफल भए पनि सहमति जुट्न सकेको थिएन । शीर्ष नेताहरूको परामर्शपछि आज बस्ने सहमति भने भएको थियो ।
प्रमुख प्रतिपक्ष दल नेपाली कांग्रेसले उपप्रधान एवं गृहमन्त्री रवि लामिछानेको नाम किटान गरेरै अनुसन्धान गर्नुपर्ने अडान राखेको छ ।
