ब्रिसबेनः अस्ट्रेलियाको ब्रिसबेनमा अस्ट्रेलिया र भारतबीच शुक्रबारदेखि शुरु भएको चौथो तथा अन्तिम टेस्ट क्रिकेट खेल रोमाञ्चक मोडमा आइपुगेको छ ।
भारतले पहिलो इनिङमा ३३६ रन बनाएर अलआउट भएको छ । भारतका लागि वासिङटन सुन्दरले ६२ तथा शार्दुल ठाकुरले ६७ रनको महत्वपूर्ण पाली खेलेका कारण भारत सम्मानजनक स्कोर खडा गर्न सफल भएको थियो ।
यस्तै भारतका लागि रोहित शर्माले ४४, चेतेश्वर पुजाराले २५, कप्तान अजिन्क्य रहाणेले ३७, रिषभ पन्तले २३ रन बनाएका थिए ।
नियमित अन्तरालमा विकेट गुमाएको भारतलाई सस्तोमै समेट्ने क्रममा अस्ट्रेलियाली बलरहरु जस हेजलवुडले ५, मिचेल स्टार्क र प्याट कमिन्सले २–२ र नाथन लायनले १ विकेट लिएका थिए ।
यसअघि शुक्रबार टस जितेर पहिले ब्याटिङ रोजेको अस्ट्रेलियाले पहिलो इनिङमा ३६९ रन बनाएको थियो।
दोस्रो इनिङ शुरु गरिसकेको अस्ट्रेलियाले तेस्रो दिनको खेल समाप्त हुँदा विनाक्षति २१ रन बनाएको छ । क्रिजमा डेभिड वार्नर २० र मार्कस ह्यारिस १ रन बनाएर खेल्दैछन् ।
पहिलो इनिङमा अस्ट्रेलियाका प्रारम्भिक ब्याट्सम्यान डेभिड वार्नर (१) र मार्कस ह्यारिस (५) सस्तैमा आउट भएका थिए ।
Australia-India Cricket
