काठमाडौँ । वरिष्ठ चिकित्सक गोविन्द केसीले प्रधानमन्त्री पुष्पकमल दाहालको राजीनामा माग गर्नुभएको छ ।
सशस्त्रद्वन्द्व कालका जघन्य अपराध गरेको जिकिर गर्दै प्रधानमन्त्री दाहालले पदमा बस्ने नमिल्ने तर्क गर्नुभयो । काठमाडौंको पशुपति क्षेत्रस्थित मृगस्थलीमा प्रधानमन्त्री दाहालको राजीनामासहित ४ बुँदै माग राख्दै आमरण अनसुनमा बस्नुभएको उहाँले संक्षिप्त प्रतिक्रिया दिँदै प्रधानमन्त्री दाहाल अभियुक्त भएकाले देश चलाउन नमिल्ने बताउनु भयो । उहाँले प्रधानमन्त्री दाहालले पदबाट तत्काल राजीनामा दिएर संक्रमणकालिन न्यायलाई टुंगोमा पुर्याउन सहयोग गर्नुपर्ने बताउनु भयो । प्रधानमन्त्री दाहालले अभियुक्त भएर देश चलाउने कुनै अधिकार नभएको वरिष्ठ चिकित्सक केसीको भनाई थियो । उहाँले द्वन्द्वकालको मुख्य अभियुक्त हुँदाहुँदै दाहाल प्रधानमन्त्री बन्दा पनि अरुले त्यसको विरोध नगरेकोमा आक्रोश पनि व्यक्त गर्नुभयो ।
उहाँले भन्नुभयो, ‘अपराधीहरु प्रधानमन्त्री, मन्त्री बन्ने ? मैले भनि हाले नि–त्यस्तो हुन सक्दैन । उनले राजीनामा दिनुपर्छ । राजीनामा दिएर यो संक्रमणकालिन न्याय प्रक्रियालाई निष्पक्ष ढंगले टुंगोमा पुर्याउन उसले सहयोग पुर्याउनु पर्छ । हो, निर्दोष छन् भने प्रधानमन्त्री बन, मन्त्री बन, मलाई कुनै आपत्ति छैन । तर अभियुक्त भएर देश चलाउन सक्दैन, देश चलाउन पाउँदैन । त्यसमा कुनै अधिकार पनि छैन । नैतिक अधिकार पनि छैन । उसले राजीनामा दिनु र्छ । अब प्रधानमन्त्री नै जघन्य अपराधको अभियुक्त छन् भने मैले मात्रै होइन, यसमा सबैले किन बोलेनन् ? स्वास्थ्य सेवामा अहिले सरकारी अस्पतालमा पनि के छ भने महंगो शुल्क तिर्नुपर्ने हुन्छ । नि:शुल्कको त कुरै छोडिदिउँ । त्यसैकारणले गर्दाखेरी के छ भने मध्यमवर्गका नेपालीहरु उपचार महंगो भएको कारणले लाखौं नेपालीहरु गरिवीको रेखामुनि धकेलिन बाध्य छन् । र निम्न वर्गका, विपन्न वर्गको त विचारा उपचार नै हुँदैन । महंगो भएर उपचार गर्न नसकेर मृत्युवरण गर्नुपर्ने अवस्था छ उनीहरुको । हजारौं, लाखौं दीर्घरोगी भएर बस्नु परेको छ । लाखौले अपांग भएर बस्नुपरेको छ । यो स्थिति छ । मैले भनि हाले नि अहिले नेपालमा नि:शुल्क स्वास्थ्य सेवा भनेको छैन । त्यो कागजमा काँहीकाँही लेखेको मात्रै हो । तर त्यो छँदैछैन । धेरै नै उपचार सेवा महंगो छ ।’
‘यो किन भएको हो त ? भन्दा तथाकथित साम्यवादी र समाजवादी नेताहरुले, पार्टीहरुले बाहेक त देश अहिलेसम्म कसैले पनि चलाएका छैनन् । तर उनीहरुले के गरेका छन् भन्दाखेरी शिक्षा र स्वास्थ्य क्षेत्रलाई चरम व्यापारीकरण गरेका छन । उनीहरुले भ्रष्टाचार गरेको कमाएको कालो धन सेतो बनाउनका लागि यसमा लगानी गरेका छन् । त्यही भएर यो चर्को महंगो भएको छ । भोट माग्ने बेलामा शिक्षा र स्वास्थ्य नि:शुल्क हुन्छन भनेर भन्छन । भनेपछि उनीहरुले व्यापारीकरण गरेर यस्तो महंगो भएको छ । जबकि यो नि:शुल्क हुनुपर्ने हो । शिक्षा र स्वास्थ्य नि:शुल्क हुनुपर्ने हो । धेरै देशहरुमा यो नि:शुल्क छ । यी कम्युनिष्टहरुले, सोसलिष्टहरुले पुँजीवाद देशहरुलाई गाली गर्दछन् नि । तर पूँजीवाद देशमा नि:शुल्क छ बरु । नेतृत्व इमान्दार छन भने यसलाई निशुल्क गर्न सम्भव छ । तर विडम्बना के छ भने यिनीहरु आफूलाई उपचार गर्नुपर्यो भने ती गरिव जनताले छाक काटेर तिरेको करबाट उपचार गर्न विदेशमा गएर उपचार महंगो उपचार गर्दछन् । तर जनतालाई नि:शुल्क उपचार छैन ।’
‘त्यसकारण नि:शुल्क उपचार हुनुपर्छ । यदि सक्दैन भन्छौं भने छोडन । अर्को आउँछ नि त । त्यसले पनि सकेन भने अर्को आउँछ । कसै न कसैले त गर्न सक्छन नि । सबै कुरामा यदि तिमी सक्दैनौ भने छोड, अर्को आउँछ । अनि शिक्षा र स्वास्थ्यको यो स्थिति छ । गेटा कलेज हामीले लडेर भवन बन्यो, सबै कुरा भयो । मैले फेरि पनि गएर दुई चोटी अनसन बसिसकेँ । सम्झौता हुन्छ प्रतिष्ठानको रुपमा खोल्ने भनेर । त्यहाँका मानिसहरु विरामी परेभने कि इण्डिया, कि काठमाडौ आउनुपर्ने हुन्छ । देउवाजीसँग डेढ वर्ष अघि सम्झौता नभएको हो र । बीचमा प्रचण्डजीले विश्वविद्यालयको अवधारण ल्याए । त्यो हुनको कारण त्यसलाई अल्मल्याउन मात्रै हो के । निजी अस्पताल र माफियाहरुको स्वार्थ पूूर्तिका लागि त्यसलाई बिथोल्ने काम गरियो ।’
वरिष्ठ चिकित्सक केसीले स्वास्थ्य शिक्षा नि:शुल्क हुनुपर्ने, गेटा मेडिकल कलेजलाई प्रतिष्ठानको रुपमा तत्काल संचालन गर्नुपर्नेलगायतका विगतमा मेडिकल क्षेत्रको सुधारका लागि आफूसँग सरकारले गरेको सबै सहमती कार्यान्वयन हुनुपर्ने माग पनि राख्नुभएको छ ।
