• १४ जेष्ठ २०८१, सोमबार
  •      Mon May 27 2024
  •   Unicode
Logo

आयरल्याण्डले पाकिस्तानलाई पाँच विकेटले हरायो



काठमाडौँ । टी–२० विश्वकपअघि पाकिस्तानले आयरल्याण्डसँग लज्जास्पद हार बेहोरेको छ । पहिलो टी–२० अन्तर्राष्ट्रिय खेलमा आयरल्याण्डले पाहुना टोलीलाई ५ विकेटले पराजित गरेको हो । एन्ड्रयु बालबर्नीले ७७ रनको उत्कृष्ट इनिङ्स खेले ।

टस हारेर पहिले ब्याटिङ गरेको पाकिस्तानका लागि कप्तान बाबर आजमले सर्वाधिक ५७ रन बनाएका थिए टोलीले २० ओभरमा ६ विकेट गुमाएर १८२ रन बनाएको थियो ।

बाबर बाहेक ओपनर साइम अयुब (४५) र इफ्तिखार अहमद (३७) बाहेक पाकिस्तानको बाँकी ब्याटिङ लाइनअप आयरिश बलरको अगाडि टिक्न सकेन । मोहम्मद रिजवान (०), फखर जमान (२०), आजम खान (०) र शादाब खान (०) ले रन बनाउन सकेनन् ।

पाकिस्तानले दिएको १८३ रनको लक्ष्य पछ्याउने क्रममा आयरल्याण्डको सुरुवात खराब रह्यो । १४ रनको स्कोरमा कप्तान पल स्टर्लिङ ८ रन मात्र बनाएर आउट भए । लोर्कन टकर ४ रन बनाएर आउट भए । तर, अनुभवी ब्याट्सम्यान एन्ड्रयु बालबर्नीले एक छेउमा आफ्नो अर्धशतक पूरा गरे । ह्यारी टेक्टरले ३६ रन बनाए ।

जर्ज डकरेलले २४ रनको योगदान दिए । बलबर्नी ७७ रन बनाएर आउट भए । अन्त्यमा ग्यारेथ डेलानी (१०) र कर्टिस क्याम्फर (१५) ले टोलीलाई जित दिलाए । आयरल्यान्डले १९.५ ओभरमा लक्ष्य पूरा गर्दै ३ खेलको शृङ्खलामा १–० को अग्रता लिएको छ ।