काठमाडौँ । काठमाडौँ महानगरपालिका वडा नं. १६ को प्रशासनिक भवनको उद्घाटन र पदवहालमा छँदै निधन हुनु भएका वडाका अध्यक्ष स्व. मुकुन्द रिजालको पूर्ण कदको शालिक एकैपटक अनावरण भएको छ ।
आज नवनिर्मित भवनको प्राङ्गणमा आयोजना गरिएको औपचारिक कार्यक्रममा महानगरपालिकाकी उपप्रमुख सुनिता डंगोल, कार्यवाहक वडाध्यक्ष पुष्प महर्जन र स्व. रिजालकी पत्नी कविता आचार्यले संयुक्त रुपमा भवनको उद्घाटन र शालिक अनावरण गर्नुभएको हो ।
कार्यक्रममा बोल्दै उपप्रमुख डंगोलले, स्व. रिजालसँग जोडिएका स्मृति उल्लेख गर्दै, वडा भवन निर्माण गर्ने लक्ष्यमा दृढ भएकै कारण कार्यालय निर्माण हुन सकेको बताउनुभयो । उहाँको सपना साकार पार्न भौतिक संरचनाबाट प्रवाह हुने सेवालाई सरल, सहज बनाउनु पर्ने धारणा राख्दै डंगोलले, स्व. रिजालका सपना वडा कार्यालयका हरेक पर्खाल, भित्ता र अन्य संरचनामा जोडिएको बताउनुभयो ।
त्यस क्रममा बोल्दै महानगरपालिकाका पूर्व प्रमुख विद्यासुन्दर शाक्यले, कामको उत्कृष्ट नतिजाका लागि राग, द्वेषको सट्टा आपसमा मिलेर काम गर्नु पर्ने बताउनुभयो । स्व. रिजालसँग जोडिएका स्मृतिको कुरा गर्दै उहाँले, स्व. रिजालका सपनासँग जोडिएका राम्रा कामलाई निरन्तरता दिनुपर्ने धारणा राख्नुभयो ।
वडाका कार्यवाहक अध्यक्ष महर्जनले, स्व. रिजालसँग काम गर्दा उहाँका सोच आफूलाई जानकारी भएको बताउँदै ती सोच कार्यान्वयनमा कमी हुन नदिने बताउनुभयो ।
स्व. रिजालकी पत्नी कविता आचार्यले, रिजालले सामाजिक रुपान्तरणका लागि देख्नुभएका सपना मध्ये वडा भवन बनाउने प्रमुखमध्येको एउटा भएको बताउनुभयो । जीवन सामाजिक सेवाकै क्षेत्रमा लागेर विताउनुभयो । आफूसँगै परिवारलाई घरको काम छोडेर सामाजिक काममा लाग्न अह्राउनुहुन्थ्यो । आचार्यले भन्नुभयो, ‘उहाँको सपनासँग जोडिएको वडा भवनबाट सबै सेवाग्राही सन्तुष्ट भएर फर्किन सकुन् । यसले उहाँको आत्माले शान्ति पाउनेछ ।’
कार्यक्रममा शालिक निर्माण गर्ने महेश तुलाधर र २९ औँ महानगर दिवस २०८० मा महानगरपालिकाले आयोजना गरेको बाँसुरी वादन प्रतियोगितामा दोस्रो स्थान हासिल गर्ने कलाकारहरुलाई सम्मान गरिएको थियो ।
२०७८ साउन ३० गते शिलान्यास भएको थियो । पूर्व प्रमुख विद्यासुन्दर, उपप्रमुख हरिप्रभा खड्गी श्रेष्ठसहित स्व. रिजालले जग पूजा र शिलान्यास गर्नुभएको थियो । शिलान्यासपछि बोल्दै स्व. रिजालले भन्नुभएको थियो, ‘वडा कार्यालयको डिजाइन गर्दा आजभन्दा १० पछिको अवस्थालाई आँकलन गरिएको छ । हामी वडाको सेवा कुनै पनि कारणले नरोकिने संरचना बनाउँदैछौँ । वडा कार्यालय बनाउने महानगरको निर्णय हरेक सेवाग्राहीको सुविधासँग जोडिएको विषय हो । यसकारण वडा कार्यालन बन्नुलाई सबैले गौरवका रुपमा ग्रहण गर्नुपर्छ ।’
भवन निर्माणका लागि २०७८ साउन २९ गते कायादेश दिइएको थियो । भवनको लागत अनुमान १० करोड ३७ लाख ३७ हजार ३१० रुपैयाँ गरिएको थियो । बोलपत्रका माध्यमबाट गरिएको खुला प्रतिस्पर्धाबाट गौरी पार्वती-के एण्ड के. जी – रमिता जेभीले ७ करोड ५३ लाख २२ हजार ६४० अर्थात् २९.१६ प्रतिशत कम रकममा निर्माण कबोल गरेपछि निर्माणको जिम्मा पाएको थियो । इञ्जिनियर श्रेष्ठका अनुसार काम कबोल गरेभन्दा कम रकम (करिव ७ करोड रुपैयाँ) मा सम्पन्न भएको छ ।
भवनका डिजाइनर सार्वजनिक निर्माण विभागका इञ्जिनियर प्रेमबहादुर श्रेष्ठकाअनुसार बेसमेन्टसहित भवन १० हजार ७०३ बर्गफुट क्षेत्रफलको छ । भवनको भूमिगत तलामा १० वटा चारपाङ्ग्रे सवारी पार्किङ् गर्ने क्षमता छ । ६ जना व्यक्ति अट्ने क्षमताको लिफ्टसहितको भवन अपाङ्गमैत्री हो ।
भवन बाहिरबाट हेर्दा नेपाली परम्परागत शैलीको छ । भित्री सुविधा आधुनिक छन् । भवनको जमिन तलामा सहरी स्वास्थ्य क्लिनिक र दर्ता चलानी कक्ष राखिनेछ । पहिलो तलामा वडाध्यक्ष, वडासचिवसहित कर्मचारीको कक्ष हुनेछ । दोस्रो तलामा वडा सदस्य र कर्मचारीको कक्ष हुनेछ । भवनमा सुविधा सम्पन्न बैठक कक्ष रहेको छ ।
१ रोपनी ४ आना २ पैसा जमिनमा भवन निर्माण भएको हो ।
