काठमाडौंः नेपालका लागि भारतीय राजदूत विनय मोहन क्वात्राले प्रधानमन्त्री केपी शर्मा ओलीलाई आज प्रधानमन्त्री निवास बालुवाटारमा आयोजित कार्यक्रमबीच भारत सरकारका तर्फबाट उपहार स्वरुप प्रदान गरिएको कोभिड–१९ विरुद्धको खोप हस्तान्तरण गर्नु भयो ।
भारतले नेपाललाई १० लाख डोज खोप उपहारस्वरुप प्रदान गरेको हो । यो खोप आजै एयर इन्डियाको विमानबाट नेपाल आइसकेको छ ।
भारतको सेरम इन्स्टिच्यूट अफ इन्डियाले उत्पादन गरेको कोभिसिल्ड नामको खोप नेपाल ल्याइएको हो । यो खोपलाई नेपाल सरकारले आपतकालीन प्रयोगका लागि अनुमति दिइसकेको छ ।
स्वास्थ्य तथा जनसंख्या मन्त्रालयले भारतबाट प्राप्त खोप पहिलो चरणमा स्वास्थ्यकर्मीलाई लगाइने तयारी छ ।
