![](https://newspolar.com/wp-content/uploads/2024/04/hardik-pandya.jpg)
एजेन्सी । मुम्बई इन्डियन्सका कप्तान हार्दिक पाण्ड्यालाई आईपीएलको आचार संहिता उल्लंघन गरेको आरोपमा २४ लाख जरिवाना गरिएको छ ।
यसका साथै मुम्बई इन्डियन्सका इम्प्याक्ट प्लेयरसहित अन्य खेलाडीले पनि सजाय भोग्नुपरेको छ । मुम्बई इन्डियन्सले मंगलबार लखनऊ सुपरजाइन्ट्स विरुद्ध आफ्नो पूरा ओभर बलिङ समयमै गरेन ।
आईपीएलको विज्ञप्ति अनुसार यो सिजनमा मुम्बई इन्डियन्सलाई स्लो ओभर रेटमा दोषी पाएको दोस्रो पटक हो र जसका कारण सम्पूर्ण टोलीले सजाय भोग्नुपरेको छ । ‘ओभर रेट अपराधको सम्बन्धमा आईपीएल आचार संहिता अन्तर्गत यो सिजनको टोलीको दोस्रो अपराध थियो ।’ विज्ञप्तिमा भनिएको छ । त्यसैले हार्दिक पाण्ड्यालाई २४ लाख जरिवाना लगाइएको छ ।
इम्प्याक्ट खेलाडीसहित मुम्बई इन्डियन्सका अन्य खेलाडीलाई पनि जरिवाना गरिएको छ । विज्ञप्तिमा भनिएको छ, ‘इम्प्याक्ट खेलाडी सहित प्लेइङ ११ का बाँकी सदस्यहरूलाई व्यक्तिगत रूपमा रु ६ लाख वा म्याच शुल्कको २५ प्रतिशत जरिवाना गरिएको छ ।’ हार्दिक पाण्ड्याको नेतृत्वमा रहेको मुम्बई इन्डियन्सले १० खेलमा सातौं हार बेहोरेको छ ।
लखनउको एकना स्टेडियममा भएको खेलमा मुम्बई इन्डियन्सले पहिले ब्याटिङ गर्दै २० ओभरमा ७ विकेट गुमाएर १४४ रन बनाएको थियो । जवाफमा लखनउ सुपरजायन्ट्सले ४ बल बाँकी रहँदै चार विकेटले खेल जित्यो । यो जितसँगै लखनउ सुपरजायन्ट्स आईपीएल २०२४ को अंक तालिकामा तेस्रो स्थानमा पुगेको छ । मुम्बई इण्डियन्सको टोली नवौं स्थानमा छ ।