एजेन्सी । आईपीएल २०२४ को ४७ औं खेलमा सोमबार कोलकाता नाइट राइडर्सले दिल्ली क्यापिटल्सलाई २१ बल बाँकी रहँदा ७ विकेटले पराजित गर्यो । यो जितसँगै केकेआर प्लेअफमा पुग्ने सम्भावना नजिक पुगेको छ ।
इडेन गार्डेनमा भएको खेलमा दिल्ली क्यापिटल्सले पहिले ब्याटिङ गर्दै निर्धारित २० ओभरमा ९ विकेट गुमाएर १५३ रन बनाएको थियो ।
जवाफमा केकेआरले १६.३ ओभरमा तीन विकेट गुमाएर लक्ष्य पूरा गर्यो । केकेआरलाई सहज जित दिलाउनको श्रेय ओपनर फिल साल्टलाई जान्छ, जसले ब्याटिङमा आतंम मच्चाए ।
फिल साल्टले दिल्लीविरुद्ध मात्र ३३ बलमा ७ चौका र ५ छक्का प्रहार गर्दै ६८ रन बनाए । यस क्रममा फिल साल्टले पूर्व कप्तान सौरभ गांगुलीको १४ वर्ष पुरानो कीर्तिमान पनि तोडे ।
फिल साल्ट आईपीएल सिजनमा केकेआरका लागि इडेन गार्डेनमा सर्वाधिक रन बनाउने ब्याट्सम्यान बनेका छन् । साल्टले चालू सिजन इडेन गार्डेनमा ६ इनिङ्समा ६८.८ को औसत र १८६ को स्ट्राइक रेटमा ३४४ रन बनाएका छन् ।
फिल साल्टले २०१० मा इडेन गार्डेनमा सात इनिङमा ३३१ रन बनाएका सौरभ गांगुलीको कीर्तिमान तोडेका हुन् । यो सूचीमा तेस्रो स्थानमा आन्द्रे रसेल छन्, जसले ७ इनिङ्समा ३११ रन बनाएका छन् । क्रिस लिनले २०१८ सिजनमा ९ इनिङ्समा ३०३ रन बनाएका थिए । गत वर्ष इडेन गार्डेनमा रिंकु सिंहले ७ इनिङ्समा २८० रन बनाएका थिए ।
