काठमाडौँ । इंग्लिस प्रिमियर लिग फुटबलमा आर्सनलले जित निकालेको छ । भर्खरै सम्पन्न खेलमा आर्सनलले टोटेनहमलाई उसकै घरेलु मैदानमा ३–२ गोलले पराजित गर्यो ।
‘नर्थ लण्डन डर्बी’मा खेलको १५ औं मिनेटमा टोटेनहमका पिएरे एमिले होएवर्गले आत्मघाती गोल गरेपछि खेलमा आर्सनलले अग्रता बनाएको थियो । २७ औं मिनेटमा बुकायो साकाले गोल गर्दै आर्सनलको अग्रता दोब्बर पारे ।
यस्तै, ३८ औं मिनेटमा काई हाभेर्ट्जले गोल गरेपछि पहिलो हाफमै आर्सनलले ३–० को अग्रता बनाएको थियो । खेलको दोस्रो हाफमा टोटेनहमले २ गोल फर्कायो । ६४ औं मिनेटमा क्रिस्टियन रोमेरोले र ८७ औं मिनेटमा सन हेउंग मिनले पेनाल्टीमा गोल गरेपछि टोटेनहम खेलमा फर्किएको थियो ।
अन्तिम समयतिर पनि खेलमा दबदबा राखेपनि टोटेनहमले गोल गर्न सकेन र आर्सनल विजयी बन्यो ।
जितसँगै शीर्षस्थानको आर्सनलको ३५ खेलबाट ८० अंक छ । दोस्रो स्थानको म्यान्चेस्टर सिटीको ३३ खेलबाट ७६ अंक छ । पराजित टोटेनहा ६० अंकसहित पाँचौं स्थानमा छ ।
