काठमाडौँ । क्रिकेटर सन्दीप लामिछानेको पुनरावेदन मुद्दामाथि आज पनि बहस हुन सकेन । उच्च अदालतमा समय अभावका कारण न्यायाधीशले मुद्दालाई नभ्याइनेमा राखेका हुन् ।
सन्दीपको मुद्दा न्यायाधीशद्वय धीरबहादुर चन्द र चन्द्रमणि ज्ञवालीको ४ नम्बर इजलासमा परेको थियो । छैटौं नम्बरमा रहेको मुद्दाको पालो नआएपछि सुनवाइ हुन नसकेको हो । यसअघि गत वैशाख १० गते तोकिएको पेशी पनि हेर्न नभ्याइनेमा परेको थियो ।
अदालतमा सुनवाइ धकेलिँदा सन्दीपले टि–२० विश्वकप खेल्ने सम्भावना सकिँदै गएको छ । नेपालले खेल्ने टी–२० विश्वकप जून २ बाट सुरु हुँदैछ । आउँदो मे १ सम्ममा नेपालले आफ्नो १५ सदस्यीय स्क्वाडको छनोट गरेर आइसीसीलाई पठाइसक्नुपर्ने छ ।
उच्च अदालतले सुनवाइमा सफाइ पाएको खण्डमा सन्दीप क्रिकेटमा फर्किन सक्नेछन् । तर, आज पनि सुनवाइ हुन नसकेपछि सन्दीप विश्वकप खेल्न अमेरिका जाने सम्भावना लगभग सकिएको छ ।
