मेलबर्नः यस वर्षको अस्ट्रेलियन ओपनमा पुरुष एकल तर्फको फाइनलमा राफायल नाडाल र डानील मेडेभेडेभबीच हुने भएको छ ।
शुक्रबार सम्पन्न सेमिफाइनल खेलमा दुबै खेलाडीले आआफ्ना प्रतिद्वन्द्वीलाई रोचक प्रतिस्पर्धाबीच पराजित गरेका थिए ।
पहिलो सेमिफाइनलमा विश्व नं. खेलाडी नाडालले म्याटिओ बेरिटिनीलाई सहजै ३–१ सेटले पराजित गरेका थिए । नाडालले बेरिटिनीलाई ६–३, ६–२, र ६–३ ले पराजित गरेका थिए । बेरिटिनीले तेस्रो सेट ६–३ ले जितेका थिए ।
याे पनि पढ्नुहाेस्
राफेल नाडाल अस्ट्रेलियन ओपनको फाइनलमा प्रवेश
चोटका कारण मुख्य प्रतियोगिता नखेलेका नाडालले यस वर्षको अस्ट्रेलियन ओपनमा भने पुनरागमन गरेका छन् । नाडालले यसअघि एक पटक अस्ट्रेलियन ओपनको उपाधि जितेका थिए ।
नाडालले हालसम्म २० वटा ग्रान्डस्लाम प्रतियोगिता जितिसकेका छन् । हालसम्म २० वटा ग्रान्डस्लामको उपाधि रोजर फेडरर र नोभाक जोकोभिचले जितेका छन् ।
अर्को खेलमा रुसी विश्व वरियतामा दोस्रो नम्बरमा रहेका डानील मेडभेडेभले निकै कडा संघर्षबीच ग्रीसका स्टिफानो चिचिपासलाई ३–१ सेट अन्तरले पराजित गरे ।
अघिल्लो दिन क्यानडाका किशोर खेलाडी फेलिक्ससँग निकै संघर्ष गर्नु परेका मेडभेडेभले आजको खेलमा भने निकै उत्कृष्ट खेल प्रस्तुत गरेका थिए । पहिलो सेट जितेर अग्रता बनाएका मेडभेडेभ दोस्रो सेटमा भने चिचिपाससँग ६–४ ले पराजित भएका थिए ।
यहीबीच तेस्रो सेटको खेल चलिरहेको अवस्थामा मेडभेडेभको अम्पायरसँग भनाभन पनि भएको थियो । तर उनले आफ्नो लय गुमाएनन् । उनले तेस्रो र चौथो सेट लगातार जितेर समग्रमा ७–६, ६–४ र ६–१ ले खेल जिते ।
यसअघि मेडभेडेभले सन् २०२१ मा युएस ओपनमा विश्व नं. १ नोभाक जोकोभिचलाई पराजित गरेका थिए । सन् २०२१ को अस्ट्रेलियन ओपनमा उनी नोभाक जोकोभिचसँग पराजित भएका थिए भने २०१९ मा युएस ओपनमा राफायल नाडालसँग पराजित भएका थिए ।
नाडालले भने सन् २००९ मा एक पटक मात्र अस्ट्रेलियन ओपनको उपाधि जितेका छन् । यद्यपी उनी अरु चार पटक २०१२, २०१४, २०१७ र २०१९ मा फाइनलमा प्रवेश गरेका थिए ।
पुरुष एकल तर्फको फाइनल खेल आइतबार हुनेछ ।
