काठमाडौं । प्रधानमन्त्री केपी ओलीले प्रचण्डले नरभक्षी आन्दोलन गर्न खोजेको आरोप लगाएका छन् । उनले भने- प्रचण्ड–माधव समुहले नरभक्षी आन्दोलन गर्न खोजेको भन्ने लागेको छ, तर सरकारले कदापि त्यसो हुन दिँदैन ।
यसअघि पटक पटक प्रचण्डले शाकाहारी आन्दोलनले नहुने र मांशाहारी आन्दोलन गरेको भनेको प्रसंग उल्लेख गर्दै भने- त्यो भनेको के नरभक्षी आन्दोलन गर्न खोजेको हो ? के त्यसो भए प्रचण्डजीहरु नरभक्षी आन्दोलन गर्न खोज्दै हुनुहुन्छ ?
काठमडौंको दरबारमार्गमा आयोजित नेकपाको ओली समूहको सभालाई सम्बोधन गर्दै प्रधानमन्त्रीले भने- उहाँहरु भन्नुहुन्छ, अब शाकाहारी आन्दोलनलाई हुदैन भनेर । शाहाकारी आन्दोलन हुदैन भनेको के हो ? चिकेन चिल्लि खान्छु भन्या हो ? उहाँले नरभक्षी आन्दोलन गर्न खोजेको हो ? म उहाँहहरुलाई भन्दिन चाहन्छु नरभक्षी आन्दोलनका दिन गए । अब नेपालमा कसैले हिंसा मच्चाउन सक्तैन ।
प्रधानमन्त्री ओलीले प्रचण्ड माधव समूहले तथाकथित नेपाल बन्द गरेर श्रमजीवीका लागि काम गर्ने भन्नेहरुले तरकारी छरेर, गाडी जलाएर क्रान्ति गर्न खोजेको भन्दै प्रचण्ड—माधव समूहलाई व्यंग्य पनि गरे ।
सो सभालाई सम्बोधन गर्दै प्रधानमन्त्री ओलीले आफुलाई काम गर्न नदिएपछि ताजा जनादेशमा गएको दाबी गरे । जनताले सरकारलाई ५ बर्ष काम गर्ने म्याण्डेड दिएको भएपनि प्रचण्ड–माधव समुहले व्यवधान गरेकाले संसद विघटन गरी ताजा जनादेशमा गएको उनले स्पष्ट पारे ।
