काठमाडौँ । गृह मन्त्रालयले देशभरका इजाजत प्राप्त हतियारको विवरण पठाउन मातहतका निकायलाई निर्देशन दिएको छ ।
सोमबार सर्वोच्च अदालतबाट इजाजत लिइएको हतियारसहित दुईजना पक्राउ परेपछि मन्त्रालयले हालसम्म इजाजत दिईएको हातहतियार तथा खरखजनाको विवरण २४ घन्टाभित्र उपलब्ध गराउन सबै जिल्ला प्रशासन कार्यालयलाई निर्देशन दिएको हो ।
‘हालसम्म हातहतियार तथा खरखजनाको इजाजतपत्र जारी गरिएका व्यक्ति, प्रयोजन, प्रकार तथा सङ्ख्यासहित नवीकरण भएरनभएको विवरण, त्यस्ता हातहतियार इजाजत विपरीत प्रयोग भएरनभएको विवरण र विना इजाजत प्रयोग गरिएको, नवीकरण नगरिएको र उद्देश्य विपरीत प्रयोग गरिएका कारण त्यस्ता हतियार बरामद गरिएको सो समेत खुलाई पत्र प्राप्त भएको मितिले २४ घण्टाभित्र उपलब्ध गराइदिनुहुन आदेशअनुसार अनुरोध छ,’गृह मन्त्रालयले काटेको पत्रमा भनिएको छ ।
हतियार तथा खरखजना ऐन २०१९ ले स्थानीय प्रशासनसँग स्वीकृति लिएर हतियार राख्न पाउने प्रबन्ध मिलाएको छ ।
