बुटबल । प्रधानमन्त्री केपी ओलीले आफूले भगवान रामचन्द्र जम्निने बेलाका सुँडेनी खोज्न म कहाँ जाउँ भनी प्रश्न गरेका छन् । शनिबार बुटबल उपमहानगरपालिका, ३ बमघाटमा आज लुम्बिनी केबलकारको शिलान्याश गर्न पुगेका प्रधानमन्त्री ओलीले भने– भगवान रामचन्द्रको जन्म कहिले भएको हो ? अनि म उहाँ जन्मिने बेलामा उहाँकी आमा कौशल्याको सुँडेनी को बसेको थियो भनेर कहाँबाट भेटौँ ?
यसअघि प्रधानमन्त्री ओलीले भगवान रामको जन्म नेपालको पर्सा जिल्लाको ठोरीमा भएको सार्वजनिक अभिव्यक्ति दिएका थिए । उनको सो भनाईप्रति धेरैले आफ्नै प्रतिक्रिया दिएका थिए । आजको उनको सो भनाई पनि यसैप्रति लक्षित थियो ।
सो केबलकारको शिलान्याशपछि सम्बोधन गर्ने क्रममा प्रधानमन्त्री ओलीले भने– अस्ती मैले एकजनाले भाषण गर्दै गरेको सुनेँ कि केपी ओलीले रामचन्द्र नेपालमा जन्मिएका हुन् भन्यो, त्यो प्रमाणित गर्नुपर्यो नि ।
उनको यो भाषण सुनेर आफूलाई अचम्म लागेको प्रधानमन्त्रीले बताए । हो, नेपाल ध्यान भूमि, तपोभूमि र ज्ञानभूमि हो, तर हामीले ऐतिहासिक र पूरातात्विक तथ्यहरु खोज्नुपर्छ, सबै भेटिन्छ । कतिपय मानिसहरुलाई आफ्नो देशको ऐतिहासिकता, सांस्कृतिक महत्वका बारेमा पनि गर्व छैन, उनीहरु अहिले पनि भन्दैछन् कि केपी ओलीले त्यो प्रमाणित गर्नुपर्यो ।
