काठमाडौं । दशरथ रंगशालामा खेलबाहेकका अन्य कार्यक्रम नगर्न युवा तथा खेलकुद मन्त्रालयले राष्ट्रिय खेलकुद परिषद्लाई निर्देशन दिएको छ ।
मन्त्रालयले विज्ञप्ति जारी गर्दै दशरथ रंगशालामा खेलकुद बाहेकका अन्य कार्यक्रम नगर्न परिषद्लाई निर्देशन दिएको हो ।
मन्त्रालयले जारी विज्ञप्तिमा रंगशालाहरुको सञ्चालन सम्बन्धमा आवश्यक मापदण्डसहितको कार्यविधि जारी नहुँदासम्म खेलबाहेक अन्य गतिविधि स्थगित गर्न राखेपलाई भनिएको छ ।
फिफा विश्वकप २०२६ छनोटको पहिलो लेगअन्तर्गत नेपाल र बहराइनबीच दशरथ रंगशालामा चैत ८ गतेका लागि तय गरिएको खेल खराब मैदानका कारण आयोजना गर्न नमिल्ने भएपछि नेपालले दुवै लेग बहराइनमै खेल्नेछ । ‘मैदानको नाजुक अवस्थाकै बीच मर्मत सम्भारविनै निरन्तर खेलकुदलगायत अन्य गतिविधि भइरहेको तर्फ यस मन्त्रालयको ध्यानाकर्षण भएको छ,’ विज्ञप्तिमा भनिएको छ ।
मन्त्रालयले राष्ट्रिय खेलकुद परिषद्सँग समन्वय गरी नीतिगत अन्योलको छिटै अन्त्य गर्दै दशरथ रंगशालासहित देशका अन्य रंगशालाहरुको सञ्चालन सम्बन्धमा आवश्यक मापदण्डसहितको कार्यविधि जारी गर्ने र खेल क्यालेन्डर बनाउने प्रक्रिया अगाडि बढिसकेको समेत जानकारी गराएको छ ।
