काठमाडौँ । नेकपा(एमाले)का सांसद ठाकुरप्रसाद गैरेले देशमा देखिएका समस्याहरुको समाधान गर्नु सबै राजनीतिक दलहरुको साझा दायित्व भएको बताउनुभएको छ ।
बिहीवार प्रतिनिधि सभा बैठकमा विशेष समयमा बोल्दै सांसद गैरेले देशमा अविकास, बेरोजगारी, तस्करी, कमिसनतन्त्र र भ्रष्टाचारको समस्या रहेको भन्दै सबै समस्याहरु साझा समस्या भएका बताउनु भयो । उहाँले ति समस्याहरुको समाधान गर्नु संसदमा भएका सबै राजनीतिक दलहरुको साझा दायित्व भएको बताउनु भयो । समस्या समाधानका लागि सरकारको विशेष पहलकदमी, भुमिका र नेतृत्व भने आवश्यक पर्ने भन्दै उहाँले सरकार त्यस दिशामा अघि बढ्नुपर्ने बताउनु भयो । उहाँले सत्तापक्ष हुँदा कुनै समस्याहरुमा चासो नदेखाउने तर प्रतिपक्ष हुनासाथ क्रान्तिकारी बन्ने प्रवृत्ति त्याग्नुपर्ने बताउनु भयो ।
उहाँले भन्नुभयो – ‘म के विश्वास राख्छु भने आगामी दिनमा नेपालका कम्युनिस्ट पार्टीहरुका बीचमा सहकार्यलाई अझ मजबुत बनाउँदै एकताको तहसम्म विकसित हुने र सबै देशभक्त, लोकतन्त्रवादी शक्तिहरुका बिचमा विकास निर्माणका प्रश्नमा सहकार्यको आचरणको दिशामा हामी अगाडी बढ्नेछौँ । सरकारमा बसेको बेला, सत्तापक्षको बेञ्चमा बसेको बेला देशमा जतिसुकै समस्या परुन् । विकास नहोस् । भ्रष्टाचार होस् । बेथिति बढुन् । कानमा तेल हालेर बस्ने । त्यसमा कुनै चासो नराख्ने ।’
‘तर प्रतिपक्षको बेञ्चमा पुग्नासाथ भयंकर क्रान्तिकारी बन्ने प्रवृत्ति हामीले त्याग्नुपर्दछ । म सबैलाई अपील गर्न चाहान्छु, आज देशमा भएका जतिपनि समस्या छन्, ति हाम्रा साझा समस्याहरु हुन् । अविकास, बेरोजगारी, तस्करी, कमिशनतन्त्र, भ्रष्टाचार यो कुनै दल विशेषका वा व्यक्ति विशेषका कुरा होइनन् । राम्रो देशका साझा समस्या हुन् । ति समस्याहरुलाई समाधान गर्ने यो संसदमा प्रतिनिधित्व गर्ने सबै सांसदहरुको, सबै दलहरुको र हामी सबैको साझा दायित्व हो । सरकारको विशेष पहलकदमी, भुमिका र नेतृत्व आवश्यक पर्छ । सरकार त्यस दिशामा अगाडी बढ्नेछ भन्ने विश्वास व्यक्त गर्दछु ।’
उहाँले आगामी दिनमा कम्युनिस्ट पार्टीहरुका बिचमा सहकार्य मजबुत हुँदै जाने विश्वास व्यक्त गर्नुभयो ।
