प्रधानमन्त्री केपी ओली आज उपराष्ट्रपति नन्दबहादुर पुन र सभामुख अग्नि सापकोटारिुद्ध खनिएका छन् । नेकपाको ओली पक्षले आज विराटनगरमा आयोजना गरेको सभालाई सम्बोधन गर्दै उनले उपराष्ट्रपति पुन र सभामुख सापकोटाले आफ्नो पदीय मर्यादा र औकात विर्सिएका भन्नेसम्मको टिप्पणी गरे ।
प्रधानमन्त्री ओलीले भने- 'उपराष्ट्रपतिले सरकारका विरुद्धमा भाषण गर्दै हिँड्नुभएको छ, के उहाँको पदीय हैसियतले त्यसो गर्न मिल्छ ? उहाँले सरकारका विरुद्धमा भाषण गर्दै हिँड्ने हो ? त्यही लेखेको छ संविधानमा ?'
उपराष्ट्रपति पुनले यसै हप्ता आयोजित नेपाल पत्रकार महासंघको महाधिवेशनमा प्रमुख अतिथिका रुपमा गरेको सम्बोधनमा सरकारको आलोचना गरेका थिए । उनले सरकारले संविधान अनुरुप काम नगरेको र प्रधानमन्त्रीले संविधान मिचेर संसदको विघटन गरेको भन्नेसम्मको टिप्पणी गरेका थिए ।
त्यसैगरी प्रधानमन्त्री ओलीले सभामुख अग्नि सापकोटालाई त सरकारका विरुद्धमा मुद्धा लड्ने झगडिया र किर्ते काम गर्ने व्यक्ति समेत भने । संसद सचिवालयमा सरकारका विरुद्धमा दर्ता गरेको अविश्वासको प्रस्तावको समयमा सभामुखले किर्ते गरेको उनले बताए ।
सभामुख जस्तो व्यक्तिले यसरी किर्ते काम गर्ने ? यसरी किर्ते हस्ताक्षर गर्ने ? अनि जनतालाई भ्रममा पार्ने हो ? प्रधानमन्त्री ओलीले सभामुखलाई सरकाकार विरुद्धमा सर्वाेच्च अदालतमा मुद्धा लिएर पुगेको झगडियासम्म भनेका थिए ।
नामै नलिई उनले भने- 'एकजनालाई सभामुख बनाइयो अहिले आएर यही सरकारका विरद्धमा मुद्धा लिएर अदालत धाएका छन्, उनको काम यही हो ? त्यो कुर्सीमा बसेर यसो गर्न मिल्छ ?'
