काठमाडौं । नेपाल वायुसेवा निगमले कार्यविधि भन्दा बाहिर गई एयरबसको क्याप्टेन तालिममा एक अवकाशप्राप्त क्याप्टेनलाई पठाउने तयारी गरेको छ ।
निगमको विनियमावली अनुसार सेवा अवधि ६ वर्ष बाँकी रहेको व्यक्तिलाई मात्र अर्को जहाज उडाउने तालीममा पठाउनु पर्ने स्पष्ट प्रावधान हुँदाहुँदै चार वर्ष पनि सेवा अवधि बाँकी नरहेका क्याप्टेन गोपाल सिंह बिष्टलाई पठाउने निर्णय निगम सञ्चालक समितिले गत शुक्रबार गरेको छ ।
नागरिकता र अन्य प्रमाणपत्रमा फरक-फरक जन्ममिति रहेका कारण पटक पटक विवादित बन्दै आएपछि निगम व्यवस्थापनले २०७५ फागुन २८ गते नागरिकताको जन्ममितिलाई आधार मान्दै ५८ वर्ष पुरा गरेको भन्दै अनिवार्य अवकाश दिए पनि पुनः विनियमावली अनुसार तीन वर्षको करार सम्झौता गरेको थियो ।
उमेर हदले सेवानिवृत्त भैसकेको तथा करार सम्झौता पनि सकिन लागेको व्यक्तिलाई तालीम गराउँदा निगमलाई ठूलै आर्थिक क्षति हुने भएपछि सरोकारवालाहरुले निगम व्यवस्थापनलाई ध्यानाकर्षण गराउँदा पनि कुनै सुनुवाई नभएको गुनासो गरेका छन् ।
निगममा महाप्रबन्धक डिमप्रकाश पौडेल र निगम अपरेशन प्रमुख दिपुराज जुहारचनले निगमको नियमलाई लत्याउँदै निर्णय गरेको भन्दै कर्मचारीहरुले असन्तुष्टि जनाएका छन् ।
न्यूजपोलार डटकमलाई प्राप्त पत्र अनु्सार बिष्टको नागरिकतामा सन् १९६१ र पासपोर्टमा सन् १९६३ जन्ममिति रहेको छ । जसका कारण नागरिकताको उमेरलाई आधार मान्दै सन् २०१९ मा उनलाई ५८ वर्ष पुगेको भन्दै अनिवार्य अवकाश दिइएको थियो ।
यता नागरिक उड्डयन प्राधिकरणले जारी गरेको उडान अनुमतिपत्रमा जन्ममिति सन् १९६३ उल्लेख गरिएको छ । नागरिकतालाई आधार मान्दा बिष्ट ६७ वर्ष पुग्नु भएको छ र ६५ वर्ष पार गरेपछि विमान उडाउनका लागि योग्य मानिँदैन ।
निगमले सन् २०२० जुलाई १५ मा एम–६० र वाई–१२ विमान नउडाउने निर्णय गरेपछि उहाँले सन् २०१९ नोभेम्बरमा राजीनामा दिनु भएको थियो तर अपरेशन प्रमुख जुहारचनले अगष्ट महिनामा राजीनामा स्वीकृत नगरी फिर्ता लिन लगायो । उमेर विवादका बारेमा एक पटक अख्तियार दुरुपयोग अनुसन्धान आयोगले चासो देखाएको थियो ।
नेपाल वायुसेवा निगममा हाल अन्तर्राष्ट्रिय उडानका लागि फ्रान्सेली एयसबस कम्पनीका दुई वटा न्यारोबडी र दुईवटा वाइडबडी जहाज छन् ।
