मेलबर्नः यस वर्षको अस्ट्रेलियन ओपनमा पुरुष एकल तर्फको उपाधि पूर्व विश्व नं. १ राफायल नाडालले जितेका छन् । यो उनको दोस्रो अस्ट्रेलियन ओपन उपाधि हो । यो सहित नाडालले २१ वटा ग्रान्डस्लाम जितेर इतिहास रचेका छन् ।
यसअघि नाडालले सन् २००९ मा अन्तिम पटक अस्ट्रेलियन ओपनको उपाधि जितेका थिए ।
मलबर्न पार्कमा झण्डै पाँच घण्टा २४ मिनेट चलेको निकै संघर्षपूर्ण फाइनलमा दुई सेटले पछि परेर पनि नाडालले विश्व नं. २ डानील मेडेभेडेभलाई ३–२ सेटले पराजित गरेका थिए ।
मेडभेडेभले पहिलो दुई सेट ६–२ र ७–६ ले जितेर अग्रता बनाएका थिए । तर त्यसपछिका तीन सेट नाडालले लगातार जितेर इतिहास रचे । नाडालले पछिल्ला तीन सेट ६–४, ६–४ र ७–५ ले जितेका थिए ।
खेलको अन्त्यसम्म पनि कसले उपाधि जित्छ भन्ने टुंगो थिएन । निकै उतारचढाब बीच भएको फाइनलमा तेस्रो सेटमा मेडभेडेभले केही गल्ती गरेका कारण सेट गुमाउनु परेको थियो । त्यसपछि नाडाल उत्कृष्ट फर्ममा प्रकट हुँदै निरन्तर दबाब कायम राखेका थिए ।
रड लेभर एरेनामा भएको फाइनल खेल हेर्न उपस्थित ठूलो संख्याका दर्शकहरुमध्ये अधिकांश नाडालका समर्थक थिए । उनीहरुले लगातार नाडालको पक्षमा हुटिङ गरेका थिए । ३५ वर्षीय नाडालको फूर्ति र स्टामिना हेर्दा लाग्थ्यो उनी २३–२४ वर्षका मात्र थिए । नाडालले कोर्टको दायाँ बायाँ, अगाडि पछाडि निरन्तर दगुरेर आफू पूर्ण रुपमा फिट रहेको देखाएका थिए ।
खेलमा मेडभेडेभले पनि कडा टक्कर दिएका थिए । खेलको मध्यभागमा दर्शकको हुटिङका कारण क्रोधित मुद्रामा देखिएका उनले आफैंले आफूलाई सम्हाल्न नसक्दा केही सुन्दर ब्रेकका अवसर गुमाएका थिए ।
यसअघि सेमिफाइनलमा नाडालले म्याटिओ बेरिटिनीलाई तथा डानील मेडभेडेभले स्टिफानो चिचिपासलाई पराजित गरी फाइनलमा प्रवेश गरेका थिए ।
गत वर्ष सन् २०२१ को अस्ट्रेलियन ओपनमा पनि मेडभेडेभ नोभाक जोकोभिचसँग पराजित भएपछि उपविजेतामै चित्त बुझाउनु परेको थियो । सन् २०१९ मा युएस ओपनमा राफायल नाडालसँग पनि उनी पराजित भएका थिए ।
नाडालले भने सन् २००९ मा पहिलो टिक अस्ट्रेलियन ओपनको उपाधि जितेका थिए । यद्यपी उनी अरु चार पटक २०१२, २०१४, २०१७ र २०१९ मा फाइनलमा प्रवेश गरेका थिए ।
यस वर्षको महिला एकल तर्फको उपाधि भने अस्ट्रेलियाली खेलाडी एस बार्टीले जितिन् ।
