काठमाडौं । सर्वोच्च अदालतले आज साँझ प्रतिनिधिसभा विघटन गर्ने प्रधानमन्त्रीको कदमलाई उल्टाइदिएको छ । यो फैसलालाई ओली पक्षीय नेकपाले भने अनपेक्षित भनेको छ । सर्वाेच्च्को यो फैसलासँगै सुरक्षा निकायलाई भने हाई अलर्टमा राखिएको छ ।
यसअघि नै नेकपा ओली समूहका नेता कार्यकर्ता र प्रचण्ड–माधव समूहबीच झडप हुनसक्ने अनुमान सुरक्षा निकायले गरेको थिए । सोही आधारमा सुरक्षा संयन्त्रले संसद पुनर्स्थापना भएको अवस्था र नभएको अवस्थामा कस्तो सुरक्षा तैनाथी गर्ने भन्ने तयारी पहिल्यै गरेको थियो ।
सुरक्षा नकायले संसद पुनर्स्थापना भएको अवस्थामा प्रदर्शन र झडपको सम्भावना कम हुने आंकलन गरेको थियो । यसै विश्लेषणका आधारमा सुरक्षा तैनाथी बढाइएको हो ।
नेपाल प्रहरीले सशस्त्र प्रहरीको समेत समन्वयमा सर्वोच्चको फैसला आउने संकेतका आधारमा ११ देखि १७ फागुनसम्मका लागि विशेष सुरक्षा योजना लागू गरेको सुरक्षा स्रोतले जनाएको छ । त्यही अनुसार उपत्यकाका संवेदनशील क्षेत्रमा सुरक्षा तैनाथी बढाइएको हो ।
उता कतिपयले नेपालमा संकटकाल पनि लाग्न सक्ने अनुमान गरेका छन् । यसै आधारमा हुनसक्ने कतिपय असुरक्षाको अवस्थालाई ध्यानमा राखेर पनि आज साँझ देखि नै राजधानी र उपत्यकाका कतिपय संवेदनशिल स्थानका साथै देशमा प्रमुख सहरहरुमा यस्तो सुरक्षा संयन्त्र बनाइएको हो ।
