झाँपा । प्रचण्ड-नेपाल समुहका अध्यक्ष पुष्पकमल दाहाल ‘प्रचण्ड’लाई व्यवसायी दुर्गा प्रसाईंले फरक बाटो नहिँड्न आग्रह गरेका छन् ।
मंगलबार व्यवसायी प्रसाईंले सञ्चालनमा ल्याएको पूर्वाञ्चल क्यान्सर अस्पतालको उद्घाटन समारोहमा पुगेका प्रधानमन्त्री केपि ओलीका आगाडी नै प्रचण्डमाथि प्रश्न गरेका हुन् ।
प्रचण्डलाइ प्रसाईंले सोधे ‘के कारणले फरक बाटो हिँड्दै हुनुहुन्छ ? म जस्ता कार्यकर्ता र शुभचिन्तकलाई धोका दिने कुरा कति जायज छ ?। ’
अस्पताल उद्घाटनको कार्यक्रममा प्रचण्ड नहुँदा मञ्च अपुरो भएको प्रसाईंले बताए । ‘यो मञ्च अपुरो छ, अर्को व्यक्ति पुष्पकमल दाहाल ‘प्रचण्ड’ हुनुहुन्छ । नेपाली जनताको मनमा विराजमान हुनुपर्ने तपाईं हो तर जनमञ्चबाट तिरस्कृत हुँदैहुँदै जनयुद्ध र जनआन्दोलन नदेखेका काजीको पछि लाग्नुहुन्छ भने जनताले तपाईंलाई माइतीघरभन्दा धेरै पर हुत्याएर घर न घाटको बनाउने छन्, तपाईं पछुताउनु हुनेछ,’ उनले भने, ‘काजी सा’पहरूले राज्यसत्ताको तर मारेको जनताले रुचाएका छैनन् । विचार गर्नुहोला प्रचण्डजी ।’
आफूले जनताको सेवा गर्दै रोजगारी सिर्जना गर्ने व्यवसाय गर्दा समेत तिरस्कृत हुनुपरेको गुनासो प्रसाईंले गरे ।
व्यवसायी प्रसाईंले तत्कालीन नेकपा एमालेका अध्यक्ष ओली र माओवादी अध्यक्ष ‘प्रचण्ड’लाई मार्सी चामलको भात खुवाएर चर्चा कमाएका थिए ।
