एजेन्सी । न्यूजिल्याण्डका केन विलियम्सनले टेस्ट क्रिकेटमा आफ्नो ३१ औं शतक प्रहार गरेका छन् । योसँगै उनी सर्वाधिक शतक प्रहार गर्ने सक्रिय खेलाडीमध्ये दोस्रो स्थानमा पुगेका छन् । उनले इंग्ल्याण्डका जो रुटलाई पछाडि छोडे, जसको ३० टेस्ट शतक छ ।
दक्षिण अफ्रिकाविरुद्धको पहिलो टेस्टको दोस्रो इनिङ्समा विलियम्सनले १०९ रनको इनिङ खेले । उनले पहिलो इनिङ्समा पनि शतक प्रहार गर्दै ११८ रन बनाएका थिए ।
माउन्ट मङ्गानुईस्थित बे ओभल मैदानमा न्यूजिल्याण्डले दक्षिण अफ्रिकामाथि ५२८ रनको अग्रता लिएको छ । दिनको खेल सकिँदासम्म उसले दोस्रो इनिङ्समा ४ विकेट गुमाएर १७९ रन बनाएको थियो ।
पहिलो इनिङ्समा न्युजिल्यान्डले ५११ रन बनाएको थियो भने दक्षिण अफ्रिकाले १६२ रन बनाएको थियो । म्याट हेनरी र मिचेल सेन्टनरले ३–३ विकेट लिए ।
टेष्टको तेस्रो दिन दक्षिण अफ्रिकाले आफ्नो पहिलो इनिङ्स १६२ रन बनाएर समाप्त गरेको थियो । न्युजिल्यान्डले ३४९ रनको अग्रता लिएर दोस्रो इनिङ्स सुरु गरेको थियो । टोलीले दोस्रो इनिङ्समा १० रनमा ओपनर टम लाथमको विकेट गुमाएको थियो । लाथमले मात्र ३ रन बनाउन सके ।
तेस्रो नम्बरमा आएका केन विलियम्सनले ओपनर डेभोन कोनवेसँग दोस्रो विकेटका लागि ९२ रनको साझेदारी गरे । कोनवे २९ रन बनाएर आउट भए र उनीहरुको साझेदारी टुट्यो । उनीपछि रचिन रविन्द्र पनि १२ रन बनाएर आउट भए ।
तेस्रो दिनको खेल सकिन ४ ओभरअघि विलियम्सनले शतक पूरा गरेका थिए । शतकपछि उनले छिटो खेल्न थाले पनि १०९ रन बनाएर आउट भए ।
सक्रिय खेलाडीमध्ये विलियमसनभन्दा अष्ट्रेलियाका स्टिभ स्मिथले मात्र बढी शतक प्रहार गरेका छन् । उनको नाममा ३२ शतक छ । विलियम्सनले पहिलो इनिङ्समा आफ्नो ३०औँ शतक प्रहार गर्दै भारतका विराट कोहलीलाई पछाडि छोडे । विराटको नाममा २९ टेस्ट शतक छ ।
