एजेन्सी । यू–१९ पुरुष विश्वकपको पहिलो सेमिफाइनल आज मंगलबार भारत र दक्षिण अफ्रिकाबीच हुँदैछ । खेल बेनोनीस्थित विलोमूर पार्क स्टेडियममा नेपाली समय अनुसार दिउँसो १ः४५ बजे सुरु हुनेछ ।
सुपर–६ चरणमा भारत समूह–१ मा शीर्ष स्थानमा रह्यो भने समूह–२ मा आयोजक दक्षिण अफ्रिका दोस्रो स्थानमा थियो ।
दक्षिण अफ्रिकामा खेलाइँदै आएको यू–१९ एकदिवसीय विश्वकपको यो १५औँ संस्करण हो । दोस्रो सेमिफाइनल अष्ट्रेलिया र पाकिस्तानबीच फेब्रुअरी ८ मा हुनेछ । भारत यस वर्ष पनि विश्वकप जित्ने प्रबल दावेदार हो । पाँच पटक उपाधि जितेको टोली भारत प्रतियोगिताको सबैभन्दा सफल टोली हो ।
भारत र दक्षिण अफ्रिका अन्डर–१९ टोलीबीच हालसम्म कूल २५ ओडिआई खेलिएको छ । भारतले १९ खेल जितेको छ भने दक्षिण अफ्रिकाले ६ खेल मात्र जितेको छ । विश्वकपमा दुवै टोली ८ पटक भिडेका छन् । जसमा भारतले चार खेल जितेको छ भने दक्षिण अफ्रिकाले पनि समान चार खेल जितेको छ ।
यी दुई टोली सन् २००८ को विश्वकपको फाइनलमा भिडेका थिए । जसमा विराट कोहलीको कप्तानीमा भारतले वेन पार्नेलको कप्तानीमा दक्षिण अफ्रिकालाई हराएर उपाधि जितेको थियो ।
